Мақолада «Эл-юрт умиди» жамғармасининг таълим дастурлари бўйича 2025 йилги 1-очиқ стипендия танлови натижалари эълон қилинганидан сўнг, якуний совриндорлар рўйхати билан солиштирилган. Ғолиблар орасида дастлабки эълон қилинган очиқ суҳбат натижалари бўйича етарли балл олмаган бўлса-да, «стипендиат» деб эълон қилинганлари аниқланган.
Журналист қизимиз шундай талабалардан камда 4 нафарини аниқлаган.
Яъни, очиқ танлов натижаларига кўра ичида стипендия ажратилиши учун Ўзбекистон Республикаси Президенти ҳузуридаги Истиқболли кадрларни тайёрлаш бўйича «Эл-юрт умиди» жамғармасининг 2025 йил 1-очиқ стипендия танлови суҳбат жараёнида номзодларни билимини баҳолаш услубиёти ва қоидаларига мувофиқ етарли 61 балл тўплай олмаган талабалар якуний стипендиячилар рўйхатидан ўрин олган.
Мухбиримиз бу ҳолнинг сабабига аниқлик киритиш учун «Эл-юрт умиди» жамғармасига қўнғироқ қилган, бироқ боғлана олмаган. Кейинроқ жамғарма матбуот хизмати ўзаро ёзишмада ҳамма степандиантларни тақдирлаш ва байрамолди тадбирлари билан банд бўлгани билан тушунтирган.
Мақолада тилга олинган, дастлаб етарли балл тўплай олмаган талабалар (Ғайбуллаев Шомурод Олимович, Тожибоев Рашид Собир ўғли, Ахмадов Шамшодбек Ваҳобжон ўғли, Кидирбаева Айнура Рашид қизи) апелляцияга ариза топшириб, уларнинг аризаси қаноатлантирилиб, Президент стипендияси совриндори бўлиш учун етарли балл берилгани маълум бўлди. (Лекин бу ҳақида расмий маълумот ҳеч қаерда йўқ. Биз бу маълумотларни талабаларнинг ўзидан, оғзаки тарзда эшитяпмиз).
Қолаверса, талаба топширган университет жаҳонда топ-100 таликка кирган бўлса, унга суҳбатдан ўтказилмасдан стипендия ажратиш белгиланган.
Аслида, «Эл-юрт умиди» жамғармаси шунчаки 173 нафар ғолибнинг рўйхатини келтирмасдан, ҳар бир ғолибнинг тўплаган бали, қайси хорижий университетга ўқишга жўнаши, суҳбатсиз стипендия ажратилган, апелляция аризалари қаноатлантирилган талабаларни ҳам алоҳида кўрсатиб ўтганида, ҳеч қандай тушунмовчиликлар ва қўшимча саволлар юзага келмасди.
Мақолада номи тилга олинган талабалар ва уларнинг ота-оналари «нега аниқлик киритмасдан ёзяпсизлар,», дея эътироз билдирмоқда. Аниқлик қандай киритилади? Бу талабаларнинг ҳар бирини қандай топамиз? Талабалар ҳозирча машҳур инсон эмас, уларга битта-битта боғланиш учун маълумотлар жамғарма сайтида ҳам йўқ. Қандайдир маълумотни фақат жамғарма тақдим этиши мумкин. (Гарчи улар шахсий маълумотларни ошкор қилмаймиз, дея тушунтиришган бўлса-да). Биз туш кўрибмизми апелляция ўтганию, баллар кўтариб берилганини?
Мана шундай ҳолатлар учун жамғарма матбуот хизмати доим алоқага ва саволларга тайёр бўлиб туриши керак-да. Ҳеч бўлмаса, сайтда эълон қилинаётган озгина, юзаки маълумотларни ҳам савол қолдирмасдан тақдим этиш мумкин эди-ку? Жамғарма матбуот хизмати раҳбари Элвина Мустафина «Заковат» мусобақаларида зеҳнини чархлагани яхши, лекин жамғарма фаолиятидаги ҳар бир воқеа, янгилик юзасидан пресс-релиз тарқатиши ҳам керак-да. (Ҳолбуки, сайтнинг пресс-релиз бўлимида 2022 йилдан буён бирорта нарса жойлаштирилмаган).
Сайтнинг кўплаб бўлимлари, русча ва инглизча версиялари ҳам ўлда-жўлда. Бошқа тилларда ҳам ўзбекча хабарлар чиқиб ётибди.
Биз жамғарма тўғри ишлаётганига шубҳа қилмаймиз. Аммо маълумотлар яширилса, саволлардан қочилса ана шундай нохуш шубҳа-гумонлар туғилаверади.
Биз эса ёзаверамиз, саволларимизни бераверамиз. Чунки жамғармага маблағлар давлат бюджетидан ажратилмоқда. Сўрашга тўлиқ ҳақимиз бор.
P.S. Жамғарманинг жамоатчиликдан ёпиқлиги туфайли биз бехабар қолиб, апелляцияга бериб стипендиант бўлган талабаларга қандайдир ноқулайлик келтириб чиқарган бўлсак, улардан, уларнинг ота-оналари ва яқинларидан узр сўраймиз. Асло уларнинг билимларини шубҳа остига олиш ниятимиз бўлмаган. Улар дохил бу йил совриндор бўлган барча 173 нафар умидли талабаларимизнинг ўқишларига муваффақиятлар тилаб қоламиз.
Шуҳрат Шокиржонов,
Vaqt.uz бош муҳаррири.