Миллий статистика қўмитаси маълумотларига кўра, январ–июн ойларида аҳоли маблағлари ҳисобига киритилган инвестициялар 17,3 трлн сўмга етди. Бу кўрсаткич ўтган йилнинг шу даврига нисбатан 15,3 фоизга кўпдир.
Ҳудудлар кесимида энг кўп инвестициялар Тошкент вилоятида қайд этилди — 2,4 трлн сўм. Бухоро вилояти 2,19 трлн сўм билан иккинчи ўринни эгаллади. Кейингиси Хоразм вилояти бўлиб, у ерда аҳоли маблағлари ҳисобига 1,57 трлн сўмлик инвестициялар амалга оширилди.
Шунингдек, Қашқадарё (1,44 трлн сўм), Наманган (1,4 трлн сўм) ва Тошкент шаҳри (1,37 трлн сўм)да ҳам кўрсаткичлар юқори бўлди. Сирдарё вилояти эса 175,3 млрд сўм билан энг паст кўрсаткични қайд этди.
Маҳаллий аҳоли маблағлари ҳисобига киритилаётган инвестициялар мамлакат иқтисодий ўсиши ва ҳудудларнинг инфратузилмавий тараққиётини таъминлашда муҳим омил сифатида кўрилмоқда. Мутасаддиларга кўра, бу жараён иқтисодий фаолликни ошириш билан бирга, аҳолининг инвестиция жараёнларидаги иштироки кенгайиб бораётганини ҳам кўрсатади.