Ўзбекистон ипотекани қайта молиялаштириш компанияси ҳисоботида қайд этилишича, бирламчи бозорда Жиззах вилояти (+8,6 фоиз), Хоразм (+5 фоиз) ва Сурхондарё (+3,2 фоиз)да уй нархлари кўтарилган. Шу билан бирга, Тошкент шаҳрида (-8,2 фоиз) ва Тошкент вилоятида (-5,7 фоиз) пасайиш давом этмоқда.
Пойтахт туманларида ҳам пасайиш кўринди. Мирзо-Улуғбек (-5,3 фоиз), Олмазор (-4,4 фоиз) ва Сергели (-4,5 фоиз)да нархлар энг кўп камайди. Миробод (-0,8 фоиз) ва Яшнобод (-0,4 фоиз)да эса тушиш нисбатан паст бўлди. Тошкентдаги энг арзон уй-жойлар Бектемир туманида (10,2 млн сўм/м²), энг қимматлари эса Миробод (17,1 млн сўм/м²) ва Шайхонтоҳур (16,2 млн сўм/м²) туманларида қайд этилди.
Иккиламчи бозорда ҳам турли ҳолат кузатилди. Қорақалпоғистонда (+9,6 фоиз), Хоразмда (+4,2 фоиз) ва Сирдарёда (+3,7 фоиз) нархлар ошган. Тошкент шаҳрида эса иккиламчи уй-жой бозорида нархлар иккинчи чоракдир пасайишда давом этмоқда, бу сафар 2,5 фоизга камайди. Миробод туманида бироз ўсиш қайд этилди. Ижара рентабеллиги бўйича энг юқори кўрсаткич Наманган (12 фоиз), Фарғона (11,1 фоиз) ва Андижон (10,1 фоиз) вилоятларида қайд этилди. Энг паст даража Навоий (6,4 фоиз), Бухоро ва Самарқанд (6,8 фоиз)да кузатилди.
Ижара бозорида эса ўртача 3,1 фоизлик тушиш рўй берди. Андижон (-10,3 фоиз) ва Навоий (-9,2 фоиз)да пасайиш катта бўлса, Сурхондарё (+7,2 фоиз) ва Қашқадарё (+1,4 фоиз)да ижара нархлари кўтарилди. Тошкентда энг юқори ижара нархлари сақланиб турса-да, айрим туманларда пасайиш сезиларли бўлди.
Қурилиш соҳасида юқори суръатлар давом этмоқда. Сўнгги йилларда 430 мингдан зиёд янги уй топширилган. 2025 йилда эса 130 мингдан ортиқ кўп қаватли уй қурилиши режалаштирилган бўлиб, уларнинг бир қисми Янги Тошкентда барпо этилмоқда. Янги уйлар энергия тежамкор материаллар асосида қурилади.
Мутахассислар фикрича, уй-жой бозоридаги айрим пасайишларга қарамай, қурилиш суръатлари ва аҳоли эҳтиёжларига боғлиқ равишда бозордаги фаоллик сақланиб қолиши кутилмоқда.