Ўзбекистоннинг энг қимматбаҳо стартапи — финтех ва электрон савдо компанияси Uzum 2026 йилда 300 млн доллар миқдорида еврооблигация чиқариш, 2027 йилда эса IPO ўтказиш орқали янги инвестицияларни жалб қилишни режалаштирмоқда. Бу ҳақда компания ҳаммуассиси Николай Селезнёв Bloomberg’га берган интервьюсида маълум қилди.
Селезнёвга кўра, IPOни ўтказиш учун Ҳонгконг, Абу Даби ва NASDAQ каби халқаро майдонлар кўриб чиқилмоқда. Шунингдек, компания яқинда Тошкентда облигациялар чиқаргани билан маҳаллий бозор молиявий эҳтиёжларни тўлиқ қоплай олмаётганини таъкидлади.
Uzum 2022 йилда тадбиркор Жасур Жумаев, Николай Селезнёв ва шериклари томонидан ташкил этилган. Ҳозирда компания 17 млн фойдаланувчига хизмат кўрсатади, финтех, рақамли банк, электрон тўлов ва етиштириб бериш хизматларини таклиф этмоқда. У жорий ойда 1,5 млрд доллар баҳосида инвестиция жалб этиб, юникорн мақомини олди.
Uzum бош офиси Тошкентда жойлашган бўлса-да, компания расман Абу Дабида рўйхатдан ўтказилган. Бу юрисдикция региондаги суверен фондларга яқинлиги ва таниш ҳуқуқий муҳит сабаб танланган. Жумаевнинг айтишича, бу фондлар кейинги инвестиция босқичларида ҳам иштирок этиши мумкин.
Uzum’нинг халқаро молия бозорларига чиқиши, Ўзбекистондаги ислоҳотлар, янгиланган сиёсий муҳит ва ёш демографик тузилманинг стартап экотизимидаги ўсишни қўллаб-қувватлаётганидан далолат беради.