Ўзбекистон Республикаси Президенти Шавкат Мирзиёев 2 сентябр куни Хитойга расмий ташриф доирасида мамлакатнинг етакчи компаниялари раҳбарлари билан учрашув ўтказди. Учрашув ишбилармонлик дастури доирасида ташкил этилган бўлиб, унда икки томонлама иқтисодий алоқаларни янада кенгайтириш масалалари кўриб чиқилди.
Тадбирда «China Gold», «China Coal Resources», «China Datang Corporation», «Tianjin Rail Transit Group», «Poly Changda», «Tianjin Urban Construction», «Jinchuan Group», «China Synfuels», «ST Wonderful», «Mizuda», «World Agriculture», «Dongzhu Ecology» каби йирик корпорациялар раҳбарлари иштирок этди.
Президент Шавкат Мирзиёев Хитой бизнесининг Ўзбекистонга қизиқиши юқори даражада эканини таъкидлаб ўтди. Унинг сўзларига кўра, ўтган йилнинг ўзида икки давлат ўртасидаги инвестициялар ҳажми 10 миллиард доллардан ошган.
Учрашувда энергетика, геология, кимё, қишлоқ ва сув хўжалиги, заргарлик саноати ҳамда жамоат транспортини модернизация қилиш йўналишлари бўйича қўшма лойиҳалар муҳокама қилинди. Шунингдек, инфратузилмани ривожлантириш ва туризм соҳаларида ҳамкорлик истиқболлари ҳам кўриб чиқилди.
Таъкидланишича, Ўзбекистон ва Хитой компаниялари ўртасидаги ҳамкорлик нафақат икки давлат иқтисодиётига, балки минтақавий ривожланишга ҳам катта туртки бериши мумкин.