Кеча, 1 сентябр куни криптовалюта биржаларида Доналд Трамп оиласи томонидан чиқарилган навбатдаги криптовалюта — WLFI токени савдога қўйилди. The Wall Street Journal хабар беришича, савдонинг биринчи кунида токен нархи ўзининг энг юқори қийматидан учдан бир қисмдан кўпроққа тушиб кетганига қарамай, Трамплар оиласининг бойлиги бир кунда 5 миллиард доллардан зиёдга кўпайган. Бу Трампга тегишли бўлган барча кўчмас мулкларнинг умумий қийматидан анча юқори.
$WLFI токени 2024 йил октябр ойида Доналд Трамп ва унинг ўғиллари Эрик ҳамда кичик Доналд Трампга тегишли бўлган World Liberty Financial номли марказлашмаган платформа томонидан муомалага чиқарилган. Бозордаги барча токенларни сотишдан олинган даромаднинг 75 фоизи тўғридан-тўғри Трамп оиласига тегишли бўлади. Токен биржага чиқарилишидан олдинроқ инвесторлар 750 миллион долларлик World Liberty токенларини харид қилишди. Натижада, АҚШ президенти оиласи ўша пайтнинг ўзидаёқ ушбу лойиҳадан тахминан 500 миллион доллар даромад олишга эришган.
Оилага бозор қиймати ҳозирда 5 миллиард доллардан ошиқ бўлган 22,5 миллиард WLFI токенлари тегишли.
Доналд Трампнинг бутун фаолияти давомида асосий бизнес соҳаси кўчмас мулк бўлиб келган. Trump Organization Нью-Йоркдаги рамзий Trump Tower осмонўпар биноси, Мар-а-Лагодаги қаср, Trump Park Avenue’даги ҳашаматли квартиралар, Trump Тоwер’га туташ савдо маркази биноси ва Seven Springs мулкига эгалик қилади. Уларнинг умумий баҳоланган қиймати жорий йил бошида тахминан 1,6 миллиард долларни ташкил этган.