Financial Times таҳлилига кўра, Пекиндаги парад Хитойнинг ҳарбий салоҳиятини намоён этиш ва Тайванга эҳтимолий можарода устунлик қилиш ниятини кўрсатди. Тадбирда Си Жинпинг Хитой армиясини давлат таянчи сифатида тақдим қилди.
Хитойнинг халқ-озодлик армияси сўнгги йиллардаги учта йирик можаро — Украинадаги уруш, Исроил–Ғазо урушидан ва Ҳиндистон–Покистон тўқнашувидан сабоқ олгани қайд этилди. Парадда ядровий зарбаларни қўллаш имкониятига эга қуроллар биринчи марта оммавий намойиш қилинди.
Энг кўзга кўринган қуроллардан бири — Dongfeng-61 қитъалараро баллистик ракетаси бўлди. Бу ракетанинг намойиши Хитойнинг ядровий арсенални кенгайтиришга интилишини, шу билан бирга АҚШ билан рақобатини кучайтираётганини кўрсатади.
Шунингдек, JingLei-1 ва JuLang-3 ракеталари, ҳипертовушли YJ-17 ракеталари, FK351 дронларга қарши ҳимоя тизими ва LY-1 лазер қуроли тақдим этилди. YJ-17 ҳипертовушли планер блоки билан жиҳозланган бўлиб, душманнинг ҳаво мудофаа тизимидан қочиш қобилиятига эга.
HSU-100 номли 20 метрли автоном сузувчи қурилма парадда энг йирик дрон сифатида эътибор қозонди. Бу робот-қайиқ разведка ёки ҳужум вазифалари учун мўлжалланган. У билан бирга AJX-002 номли минақўювчи дрон-субмарина ҳам намойиш қилинди — экспертлар бу қурол Тайванни блоклашда қўлланилиши мумкинлигини таъкидлашди.
Парадда янги дронлар, танкларда ўрнатилган разведка қурилмалари ва радиоэлектрон ускуналар билан жиҳозланган робот-итлар ҳам намоён бўлди. Хитой армиясининг замонавий технологияларга бўлган урғуси яққол кўринди.