Россиянинг ҳарбий-саноат компаниялари, жумладан, «Рособоронэкспорт», санкциялар сабаб экспортдан тушган пулни банк орқали эмас, нақд банкнотларда қабул қилмоқда. Nordsint таҳлилчилари маълумотларига кўра, 2022 йилдан бери Россияга турли мамлакатлардан тоннага яқин банкнот келтирилган.
Масалан, Туркиянинг Мудофаа саноати агентлиги «Рособоронэкспорт»га оғирлиги 23,4 кг бўлган, 5 млн қийматдаги пул юборган. Валюта ва номинал аниқ эмас, аммо тахминларга кўра, еврода бўлган. Reuters хабарига кўра, Туркия 2024 йилда Россияга банкнот етказиб бериш марказига айланган.
Мянма ҳам пул юборган давлатлар қаторида. 2023 йил октябрида «Рособоронэкспорт» 492,5 кг оғирликдаги, 50 млн долларлик посылка қабул қилган. Бу 100 долларлик купюралардаги тўлиқ тўлов сифатида қайд этилган. Шунингдек, «Мотор» авиаремонт компанияси ва «Гидроавиасалон» ҳам Туркманистондан пулли жўнатмалар олган.
Африкада эса Руанда Россиянинг ҳамкорига айланган. 2024 йил бошида «Рособоронэкспорт» Руанда мудофаа вазирлигидан 29,1 млн долларлик купюралар олган. 2023 йилда ҳам Руанда 327 кг банкнот юборгани қайд этилган.
Таҳлилчиларнинг таъкидлашича, банк воситаларидан фойдаланиш чеклангани сабаб Россия экспортида нақд пулга ўтиш кенгаймоқда. Бу нафақат молиявий хавфлар, балки халқаро назорат нуқтайи назаридан ҳам жиддий муаммоларга олиб келиши мумкин.
Аввалроқ санкциялар сабабли Владимир Путин самолётига Аляскада ёнилғи нақд пулга қўйилгани ҳақида хабар берган эдик.