Давлат хавфсизлик хизмати Фарғона вилояти бошқармаси ва Божхона органлари ҳамкорлигида ўтказилган тадбирда қимматбаҳо тилла заргарлик буюмлари ноқонуний айланмасига чек қўйилди.
Маълумотларга кўра, Фарғона туманида яшовчи 1987 йилда туғилган шахс қирғизистонлик одам орқали «ўзбек-қирғиз» давлат чегарасидаги айланма йўллардан мамлакатга ноқонуний равишда олиб кирилган заргарлик буюмларини қабул қилган.
Ушбу товарларни моддий манфаат эвазига Фарғона шаҳрида кутиб турган, Андижон вилояти Жалақудуқ туманида яшовчи 1997 йилда туғилган шахсга етказиб бериш вақтида уларнинг иккаласи ҳам қўлга олинган.
Тилладан ясалган заргарлик буюмларининг умумий оғирлиги 5 кг 706 грамм бўлиб, дастлабки ҳисобга кўра қиймати 5 млрд 746 млн сўмга етгани аниқланган.
Ҳозирда мазкур шахсларга нисбатан терговга қадар текширув ҳаракатлари олиб борилмоқда.
Аввалроқ қимматбаҳо металлар ва тошларга оид ҳуқуқбузарликлар ҳақида «Soliq» мобил иловаси орқали хабар берган шахсларга ундирилган жариманинг 50 фоиз миқдорида мукофот тўланиши ҳақида хабар берган эдик.