2025 йил 8 сентябр куни Ўзбекистон Республикаси товар-хомашё биржасида (UZEX) халқаро миқёсда муҳим учрашув бўлиб ўтди. Унда дунёнинг энг йирик товар биржаси ҳисобланувчи Чикаго товар биржаси (CME Group)нинг Осиё-Тинч океани минтақаси бўйича бошқарувчи директори Рассел Бити иштирок этди.
Тошкентда бўлиб ўтган учрашув давомида томонлар ўзаро ҳамкорликни кенгайтириш, замонавий савдо механизмларини жорий этиш ва халқаро тажрибани маҳаллий бозор шароитига мослаштириш бўйича музокаралар олиб бордилар. UZEX бошқарув раиси Асадулла Қаюмов мазкур ташрифни стратегик аҳамиятга эга деб баҳолаб, бу ҳамкорлик Ўзбекистондаги биржа тизимини янги босқичга олиб чиқишини таъкидлади.
Маълумот учун, CME Group дунёдаги энг йирик молиявий деривативлар биржаси бўлиб, товарлар, валюта, қимматли қоғозлар ва бошқа турдаги молиявий инструментлар савдосини амалга оширади. Ушбу биржа ҳар куни миллиардлаб долларлик операцияларни амалга оширади ва глобал молия бозорида муҳим ўрин тутади.
Рассел Бити Ўзбекистонда олиб борилаётган иқтисодий ислоҳотларга ижобий баҳо бериб, маҳаллий мутахассислар учун халқаро стандартларга мос ўқув дастурларини ташкил этишга тайёрлигини билдирди. Унинг сўзларига кўра, бу йўналишдаги ташаббуслар икки томонлама манфаатли ҳамкорлик учун мустаҳкам асос яратади.
Учрашув якунида томонлар алоқаларни изчил давом эттириш, мунтазам маслаҳатлашувлар ўтказиш ҳамда биржа савдоларини рақамлаштириш ва модернизация қилиш бўйича келишиб олдилар. Бу ташриф UZEX’нинг халқаро молиявий тизимларга чуқур интеграциясини тезлаштириши мумкин.