Тадқиқотчилар семизлик ортиши ҳолатини арзон ва юқори калорияли маҳсулотларнинг анъанавий овқатланиш ўрнини босиб бораётгани билан изоҳламоқда.
Маълумотларга кўра, 5 ёшдан 19 ёшгача бўлган ҳар бешинчи бола — жами 391 миллион нафар — ортиқча вазнга эга. Улардан кўпчилиги семизликдан азият чекмоқда. Бироқ кам ва ўрта даромадли давлатларда беш ёшгача бўлган болалар орасида кам овқатланиш муаммоси ҳамон жиддийлигича қолмоқда.
ЮНИСЕФ 190 дан ортиқ мамлакат маълумотларига таянади. 2000 йилдан буён болалар орасида вазн етишмовчилиги 13 фоиздан 9,2 фоизга тушган бўлса, семизлик кўрсаткичи 3 фоиздан 9,4 фоизга кўтарилгани қайд этилган. Бугунги кунда Қора Африка ва Жанубий Осиёдан ташқари барча минтақаларда ортиқча вазн ҳолатлари устунлик қилмоқда.
Энг юқори семизлик даражалари Тинч океани орол-давлатларида қайд этилган: Ниуэ — 38 фоиз, Кук ороллари — 37 фоиз, Науру — 33 фоиз. Мутахассислар бу кўрсаткичларни импорт қилинадиган арзон, юқори калорияли маҳсулотларнинг оммалашуви билан боғламоқда.
ЮНИСЕФ таъкидлашича, болаларда соғлом овқатланишни таъминлаш — уларнинг ўсиши, ақлий ривожланиши ва руҳий саломатлиги учун ҳал қилувчи аҳамиятга эга. Шу боис ташкилот мамлакатларни маҳсулотлар маркировкаси ва маркетингини чеклаш, мактабларда зарарли егуликлар савдосини тақиқлаш каби чораларни кўришга чақирди.