АҚШ президенти Доналд Трамп Fox News телеканалига берган интервьюсида Россияга нисбатан қаттиқ чоралар кўрилиши мумкинлигини очиқча билдирди. Унинг сўзларига кўра, сабри тезда тугаётгани ва энди жавоб чоралари зарурлиги қайд этилди.
Трампнинг айтишича, янги санкциялар асосан банк тизими ва нефть соҳасига қаратилган бўлади. Шунингдек, у тарифларни ҳам кучайтиришини билдириб, аввал Ҳиндистонга нисбатан шундай чора қўлланилганини эслатди.
Президентнинг таъкидлашича, Россия ҳозирча тўрт йилдан бери давом этаётган урушни якунлашга тайёрми-йўқми, бу борада аниқлик йўқ. У, шу билан бирга, Украина президенти Володимир Зеленский музокараларга жуда ҳам тез тайёрлик кўрсатмаганини қўшимча қилди.
Трамп «танго учун икки киши керак» дея изоҳ бериб, баъзи вазиятларда Путин рози бўлганида Зеленский рад этганини, Зеленский тайёр бўлган пайтда эса Путин иккиланиб қолганини таъкидлади. Унга кўра, ҳозир Зеленский музокараларга тайёр, аммо Путиннинг позицияси ҳали номаълумлигича қолмоқда.