Fitch Ratings халқаро рейтинг агентлиги Франциянинг узоқ муддатли кредит рейтингини «AA-»дан «A+»га туширди ва прогнозни «барқарор» деб белгиланди. Бу қарор мамлакатнинг ўсиб бораётган давлат қарзи ва иқтисодий хатарларга қарши иммунитети сусайиши билан изоҳланди.
Агентлик маълумотига кўра, Франциянинг давлат қарзи 2024 йилда ЯИМнинг 113,2 фоизини ташкил этган бўлса, 2027 йилга келиб у 121 фоизга етиши мумкин. Бу эса молиявий сиёсатнинг манёвр қилиш имкониятларини чеклаши айтилмоқда.
Fitch рейтинг пасайишининг яна бир сабаби сифатида мамлакатдаги сиёсий бўлиниш ва ҳукуматнинг фискал консолидация олиб боришдаги қийинчиликларини кўрсатди. Хусусан, Франция ҳукуматининг 2029 йилгача бюджет танқислигини ЯИМнинг 3 фоизига тушириш режаси амалга ошмаслиги мумкинлиги қайд этилди.
Европа Иттифоқи молиявий интизомига риоя қилишда ҳам Франция сусткашлик қилгани танқид қилинган. Шу билан бирга, Fitch Португалиянинг рейтинги «A-»дан «A»га кўтарилганини маълум қилди. Мамлакат давлат қарзи 2020 йилдаги 134,1 фоиздан 2025 йил биринчи чорагида 96,4 фоизгача тушган.
Fitch Португалия муваффақиятини самарали бюджет сиёсати, иқтисодий ўсиш ва бюджетдаги профицит билан боғлади. Шунингдек, Standard & Poor’s агентлиги ҳам Испания рейтингини «A»дан «A+»га оширди. Бу Испанияда хусусий сектор қарзини камайтириш ва ташқи молияга боғлиқликни қисқартириш ишларининг натижаси сифатида баҳоланди.