Сирдарё вилояти Янгиер шаҳрида Давлат солиқ инспекцияси раҳбари А.Бегматов ишдан бўшатилди. Бу ҳақда ҳуқуқ ҳимоячиси Абдураҳмон Ташанов ўзининг Facebookʼдаги саҳифасида маълум қилди.
Маъмурий иш материалларига кўра, амалдор эри мусофирда бўлган тадбиркор аёлга шилқимона СМС хабарлар ёзиб, бир неча ой давомида безовта қилиб келган.
Хабар қилинишича, эркак аёлга фақат хат ёзибгина қолмай, балки унинг дўконига бир неча марта солиқ назоратчиларини ҳам юборган. У аёлнинг аҳволидан хавотирда эканлигини айтиб, кечқурун «чой ичиш» баҳонасида учрашишни таклиф этган. Қўрқувга тушган тадбиркор аёл бир неча кун давомида дўконига бормай, уйида ўтирган.
Хабарга илова қилинган ҳужжатларга кўра, Ўзбекистон Солиқ қўмитаси хизмат текшируви ўтказиб, инспекция раҳбарини ишдан бўшатган. Иш бўйича тўпланган материаллар прокуратурага юборилган.
Ҳуқуқ ҳимоячисини ғазаблантиргани эса прокурор майда безорилик билан иш очгани бўлган.
«Аммо бу майда безорилик ва миллий зеҳният, ўзбекчилик туфайли бир оила бузилиши, етимлар статистикаси юксалиши мумкин эди. Бу ўринда смс хабарларини ошкор қилиш, оилани яна-да мураккаб аҳволга солишни истамайман, аммо нега прокуратура кўриниб турган мансабни суиистеъмол қилишни яширмоқда», — дея ёзди Ташанов.
Ҳуқуқбоннинг таъкидлашича, тадбиркор «ердан чиққан қўзиқорин эмас, солиқбошининг зирҳли амали бўлмаса, бундай шилқимларга қандай жавоб беришни ўзи билади».
«Бироқ бу ерда субъектив жиҳатдан давлат ҳокимиятининг кучи бор, эҳтимол шунинг учун ҳам прокуратуранинг тили қисиқдир. Аммо прокурорлар бир бечора бировга олақараса, прокурорнинг шерга айланишини биласиз», — дея қўшимча қилди у.