The New York Times АҚШ президенти Доналд Трампнинг 15 млрд долларлик даъвосига расмий муносабат билдирди. Газета раҳбариятига кўра, даъво асоссиз бўлиб, у фақат мустақил журналистик фаолиятни чеклашга уриниш сифатида баҳоланган.
«The New York Times турли тазйиқлардан чўчимайди. Биз фактларни холис текширишда ва америкаликлар номидан савол беришда давом этамиз. Биринчи тузатиш (Конституция) билан белгиланган сўз эркинлиги ҳуқуқини ҳимоя қиламиз», — дейилади нашр баёнотида.
Трампнинг даъво аризасида The New York Times билан бир қаторда газетанинг тўрт нафар мухбирлари ҳамда Penguin Random House нашриёти ҳам жавобгар сифатида кўрсатилган. Reuters хабарига кўра, Трампнинг даъвоси 2024 йилги президентлик сайловлари олдидан чоп этилган мақолалар ва Penguin томонидан нашр этилган «Счастливый неудачник» китобидаги маълумотларга боғлиқ. Унда Трампнинг президентликка яроқсизлиги ҳақида ёзилган эди.
Трамп ўз баёнотида The New York Times’ни «АҚШ тарихидаги энг ёмон ва таназзулга юз тутган газеталардан бири» деб атади. У шунингдек, газетани Демократик партия номзоди Камала Харрисни сайлов жараёнида қўллаб-қувватлаганликда айблаб, буни «тарихдаги энг йирик ноқонуний сиёсий ёрдам» сифатида баҳолади.
Президентнинг Truth Social ижтимоий тармоғида ёзганига кўра, даъво Флорида штатида расмийлаштирилган. Президент газета вакиллари «ўнлаб йиллар давомида Трамп ва унинг оиласи, бизнеси ҳамда MAGA ҳаракатини ҳақорат қилиб келган»ни айтган.
Бу Трампнинг оммавий ахборот воситаларига қарши биринчи суд иши эмас. 2024 йил ноябрда у CBS ва Paramount компанияларига Камала Харрис билан эфирга узатилган интервю учун даъво қилган ва натижада Paramount 16 млн доллар, ABC News эса 15 млн доллар миқдорда компенсация тўлашга рози бўлган. Шунингдек, Трамп The Wall Street Journal газетасига ҳам 10 млрд долларлик даъво аризаси киритган.
Трампнинг медиатузилмаларга қарши қатор суд ишлари ортидан, The New York Times ўз позициясини қатъий белгилаб, сўз эркинлигини ҳимоя қилишда давом этишини маълум қилди.