15 сентябрдан бошлаб Мозори Шарифда интернет провайдерларига Wi-Fi хизматларини узиш буйруғи берилди. Маҳаллий компаниялар бу қарорни тасдиқлаб, Афғонистон бўйлаб кабелли интернет ҳам ўчирилганини маълум қилди. Шу билан бирга, мобил алоқа ҳозирча ишлаб турибди. Бу ҳақда Afghanistan International хабар берди.
Кобулдаги интернет хизмат кўрсатувчи компания вакиллари оптик толали интернет тахминан 20 кун олдин тўхтатилганини айтган. Улар Алоқа вазирлигига мурожаат қилган бўлса-да, буйруқ тўғридан-тўғри Қандаҳордан келгани айтилган.
Балх вилояти ҳокими Муҳаммад Юсуф Вафа интернет компаниялари билан ўтказган йиғилишда бу чеклов «Толибон» етакчиси Ҳайбатуллоҳ Оҳундзода буйруғи эканини маълум қилган. Расмийлар бундай чора «ахлоқсизликнинг олдини олиш» воситаси сифатида асосланмоқда.
Улар олдин ҳам ТикТок, ПУБГ каби иловаларга ҳамда порнографик сайтларга киришни тақиқлашни буюрганди. Аммо хизмат кўрсатувчилар филтратсия харажатлари ойига 50 мингдан 100 минг долларгача тушишини, шунинг учун бу иловаларни тўлиқ блоклай олмаганликларини маълум қилган.
Манбаларга кўра, эндиликда Охундзода юқори тезликдаги интернетни бутунлай тўхтатиш орқали жамоатчилик фикрини назорат қилишга уринмоқда. Янги сиёсат босқичма-босқич амалга оширилиши режалаштирилган. Оптик тўр ишламаганидан кейин мамлакатда интернет тезлиги ўртача 40 Mbit/s дан 4–6 Mbit/s гача тушган.
NetBlocks маълумотларига кўра, 2024 йилда дунё бўйича 54 давлатда 296 марта интернет чеклови қайд этилган. Таҳлилчилар Афғонистондаги янги сиёсат шаҳарларда савдо-сотиқ, таълим ва маданий ҳаётга жиддий салбий таъсир кўрсатишини таъкидламоқда.