Беларуснинг бўлажак президенти «порох ҳидлаган» «кучли эркак» бўлиши керак. Бу ҳақда амалдаги президент Александр Лукашенко Халқ бирлиги кунига бағишланган учрашувида сўз очди.
«Мен ҳам жамиятда келажакдаги президентларни қидиряпман ва кўришни истайман. Аммо кўплаб шахсларни кўриб чиқиб, бу вазифани эплаёлмасликларини тушуниб етяпман. Агар туғма қобилият бўлмаса, янги одам президентлик лавозимига етишиб олиши учун вақт керак. Агар табиатдан сенга президентлик истеъдоди берилмаган бўлса — Беларус ишларига аралашма»,- дея таъкидлади у.
Унинг сўзларига кўра, Беларус атрофидаги вазият жуда мураккаб бўлиб қолмоқда ва бундай шароитда мамлакатни «порохнинг ҳидлаган кучли эркак» бошқариши керак.
«Бу менинг нуқтаи назарим. Аёлларни чексиз ҳурмат қиладиган инсоннинг фикри. Аёл — табиат яратган намуна. Шундай бўлса-да, ҳозирги кунда уни бу қизиган товага ташлаш мумкин эмас деб ўйлайман», — дея изоҳ берди Беларус раҳбари.
Эътиборли жиҳати шундаки, июл ойида Лукашенко Time нашрига берган интервюсида ўғли Николайни президентлик лавозимидаги вориси деб ҳисобламасликни сўраганди. Шунингдек, Беларус раҳбари навбатдаги президент ҳозиргидан фарқли сиёсат юритиши мумкинлигини тан олган.
Лукашенко мамлакатни 1994 йилдан бери бошқариб келмоқда. У етти марта президент этиб сайланган: 1994, 2001, 2006, 2010, 2015, 2020 ва 2025 йилларда. Беларус президенти беш йил муддатга сайланади. Навбатдаги президентлик сайлови 2030 йилга мўлжалланган.