Россия президенти Владимир Путин Александр Гуцанни Бош прокурор этиб тайинлаш таклифини Федерация Кенгашига киритди. Бу ҳақда сенатор Андрей Клишас маълум қилди. Унга кўра, номзод 23 сентябр куни кўриб чиқилади, 24 сентябрда эса расмий маслаҳатлашувлар ўтказилади.
Гуцан Ленинград давлат университети (ҳозирги Санкт петербург давлат университети)нинг ҳуқуқ факультетида Дмитрий Медведев ва Адлия вазири Константин Чуйченко билан бирга таҳсил олган. У курс старостаси ва комсорги бўлган. 2007–2018 йилларда Юрий Чайка бош прокурорлик қилган даврда Гуцан унинг ўринбосари лавозимида ишлаган.
Гуцан давлат айбловчиси сифатида қатор муҳим ишларда иштирок этган. Хусусан, давлатга хиёнатда айбланган отставкадаги капитан Александр Никитинга оид суд жараёнида қатнашган ва бу ишда айбловлар тўлиқ рад этилган. 2016 йилда эса Домодедово аэропортининг собиқ эгаси Дмитрий Каменшикка қарши жиноят ишини тугатишни талаб қилган. У 2011 йилдаги террор ҳужуми учун хавфсизлик чораларига риоя қилмаганликда айбланаётган эди.
Александр Гуцан — Россия Федерациясининг I даражали ҳақиқий давлат маслаҳатчиси, бу эса армия генерали ёки флот адмиралига тенг фуқаролик унвони ҳисобланади. У шунингдек, Хавфсизлик кенгаши ва Давлат кенгаши аъзоси, Россиянинг ҳурматли юристи, «Шон-шараф» ва «Дўстлик» орденлари соҳиби ҳисобланади.