Тошкент шаҳридаги «Guangzhou Medical of China» клиникасида ишлаган хитойлик шифокор Хе Кианг ва унинг ўғли Хе Фенг фирибгарлик ва сифатсиз дори воситаларини тарқатиш айблови билан суд қилинди. Улар 100 нафар фуқарони турли йўллар билан алдаб, катта миқдордаги маблағларни қўлга киритишган.
Отa-ўғил 2020 йилнинг ноябр ойидан клиникада ишлаб келган. Беморларга сифатсиз ва самарасиз дориларни бериб, пулини шахсий эҳтиёжларига сарфлаб юборган. Улар тиббий усулларсиз ташхис қўйиб, игна терапияси ва турли дори воситалари орқали даво топиш мумкинлигини айтиб, одамларни алдаган.
Kun.uz танишган суд ҳужжатларига кўра, Хе Кианг ва Хе Фенг 2024 йилда Қозоғистонда қидирувда қўлга олиниб, Ўзбекистонга экстрадиция қилинган ва қамоққа олиш тарзидаги эҳтиёт чораси қўлланилган.
Суд жараёнида Хе Кианг айбини тан олган. Унинг сўзларига кўра, 2020 йилда ўғли билан Ўзбекистонга келиб клиникада иш бошлаган, ҳар ой 1 300 доллар маош олган. 2022 йилда эса Хитойга қайтган. У беморларга кимёвий эмас, балки гиёҳлардан тайёрланган дори тавсия қилганини, жабрланувчиларга етказилган зарар қисман қопланганини айтган ва суддан енгиллик сўраган. Унинг ўғли ҳам шунга ўхшаш кўрсатма берган.
Судда жабрланувчиларнинг барчаси турли касалликлар билан «Guangzhou» клиникасига мурожаат қилгани, бироқ даво топмагани ҳақида айтган.
Отa-ўғилнинг қилмиши оғир жиноят сифатида қайд этилган бўлса-да, улар тарқатган воситалар инсон соғлиғига хавфли кимёвий дори эмас, балки гиёҳлардан тайёрлангани инобатга олиниб, суд жамиятдан ажратилмаган ҳолда катта миқдордаги жарима жазосини тайинлаган.
Жиноят ишлари бўйича Бектемир туман суди 2025 йил 29 августдаги ҳукмига кўра, Хе Кианг Жиноят кодексининг тегишли моддалари бўйича айбли деб топилиб, 33,2 млн сўм, Хе Фенг эса 30,2 млн сўм миқдорида жаримага тортилган. Шу билан бирга уларга нисбатан қамоқ эҳтиёт чораси бекор қилиниб, суд залида озод этилган.
Суд жабрланувчиларга етказилган умумий 381 млн 402 минг сўм моддий зарарни Тошкент шаҳар ИИББнинг депозит ҳисобрақамида сақланаётган, дастлабки терговда Жао Дан томонидан тўланган 300 млн сўм ҳамда «Guangzhou Medical of China» МЧЖда ўтказилган тинтув давомида олинган 107 млн сўм ҳисобидан қоплашни белгилаган.
Жиноят ишининг бир қисми алоҳида иш юритувига олинган. Бу бўйича гумонланувчиларга нисбатан қидирув эълон қилинган.
Маълумот учун, «Guangzhou» клиникасига нисбатан жиноят иши 2022 йилда қўзғатилган бўлиб, ўша вақтда беморларга арзон дориларни қимматбаҳо қилиб сотиш ҳолатлари ҳақида хабар тарқалган эди.