Украина дронлари томонидан амалга оширилаётган ҳужумлар ва Россия энергетика компанияларининг ички бозорга йўналиши оқибатида мамлакат нефт маҳсулотлари экспорти сезиларли даражада камайди. Bloomberg агентлигининг маълум қилишича (https://www.bloomberg.com/news/articles/2025-09-19/russian-fuel-flows-slump-as-plants-hit-home-demand-prioritized), сентябрь ойининг биринчи ярмида экспорт ҳажми кунига 300 минг баррелга қисқарган.
Vortexa маълумотларига кўра, дизел ва бензин экспорти ўтган ойга нисбатан 12 фоизга камайиб, тахминан 699 минг баррелга тушган. Авиакеросин экспорти эса 10 минг баррел билан йиллик антирекордни янгилаган.
Шу билан бирга, ягона ўсиш қайд этилган маҳсулот — мазут бўлди. Унинг экспорти кунига 835 минг баррелгача кўтарилиб, 2023 йил апрелидан бери энг юқори даражага етди. Асосий харидорлар — Ҳиндистон бошчилигидаги Осиё давлатлари.
Вакуумли газойл каби қайта ишлаш учун мўлжалланган хомашё экспорти ҳам пасайиб, кунига 53 минг баррелгача тушган.
Bloomberg нашрининг таъкидлашича, агар ушбу динамика сақланса, сентябрь ойи 2022 йилдан буёнги энг паст экспорт даражаси билан якунланади. Бу эса Украина дрон ҳужумларининг Россия нефт саноатига жиддий таъсир кўрсатаётганини тасдиқлайди.
Шунингдек, Россия ҳукумат расмийлари октябргача автомобил ёнилғиси экспортини тақиқлашни узайтириш ва дизель ёнилғисини ички бозорга йўналтириш масаласини кўриб чиқмоқда.