Financial Times нашрининг ёзишича (https://www.ft.com/content/87f1309f-ca19-4c9f-9306-aa89c24f8aac), янги ташаббус муаллифлари — Сенат ташқи муносабатлар қўмитаси раиси, республикачи сенатор Жим Риш ва демократ Жин Шаҳин. Ушбу қонун Россияга нисбатан уч босқичли санкция зарбасини назарда тутади.
Биринчидан, Россия нефтини экспорт қилишда фойдаланилаётган «хуфиёна флот»га чек қўйилади. Иккинчидан, суюлтирилган газ лойиҳаларига қарши санкциялар қўлланилади. Учинчи босқич эса Россия мудофаа саноатини қамраб олади.
Ришнинг таъкидлашича, гарчи Москва санкцияларга чап беришга уринаётган бўлса-да, АҚШ буни тўхтатиш ниятида. «Бу кемалар ва улар орқали амалга оширилаётган нефт савдоси Америка ва Европанинг хавфсизлигига бевосита таҳдид солмоқда», — деди у.
Лойиҳа икки партия — ҳам республикачилар, ҳам демократлар томонидан қўллаб-қувватланмоқда. Уларнинг орасида Доналд Трампга яқин сенаторлар Линдси Грэҳэм ва Том Коттон ҳам бор.
Бундан олдин, бир гуруҳ сенаторлар Россияни «терроризмни қўлловчи давлат» деб эътироф этишга қаратилган қонун лойиҳасини тақдим этганди. Унга сабаб сифатида Москва томонидан 19 минг украин боласининг ноқонуний олиб кетилиши кўрсатилган.