Евроиттифоқ Россияга қарши санкцияларнинг 19-пакетини тасдиқлади. Янгиланган чекловлар 2027 йил январгача Россия суюлтирилган табиий гази (СТГ) импортини тўлиқ тақиқлашни ўз ичига олади — бу аввал белгиланган муддатдан бир йил олдинроқ амалга ошади.
Евроиттифоқ «Роснефт» ва «Газпром нефт»га тегишли барча истисноларни ҳам бекор қилди. Санкциялар «хуфиёна флот» ва уни қўлловчи 118 та кемага кенгайтирилди. Жами санкцияга тушган Россия кемалар сони 560 тадан ошиб кетди.
Европа Иттифоқи Россия банклари ва молиявий муассасалари билан барча транзакцияларни тақиқлади, шунингдек, тезкор тўлов тизими ҳам санкцияга учради. Россиянинг ҳарбий-саноат комплекси билан боғлиқ эркин иқтисодий зоналарга инвестициялар ҳам тақиқланди.
Тақиқлар юқори технологиялар, сунъий интеллект ва геомаълумотларга ҳам кенгайтирилди.
Шунингдек, 3 сентябрдан бошлаб Европа Россия нефти учун баррелига 47,6 долларлик юқори нарх чегарасини кучга киритди. ЕИдан четда жойлашган давлатлар орқали чекловларни айланиб ўтаётган компанияларга нисбатан ҳам чоралар кўрилади.
«Биз Ҳиндистон ва Хитой каби учинчи давлатлардаги нефтни қайта ишлаш заводлари, трейдерлар ва нефт-кимё компанияларини ҳам қамраб оламиз», — деди Урсула фон дер Ляйен.