Сингапур ташқи ишлар вазири Вивиан Балакришнан парламентдаги чиқишида мамлакат расмийлари ғайриқонуний изроиллик посёлка раҳбарларига қарши йўналтирилган санкциялар жорий этишини маълум қилди. Шу билан бирга, у Сингапур Фаластин давлатини тегишли шароитлар мавжуд бўлганида расман тан олишга тайёрлигини тасдиқлади.
Вазирнинг таъкидлашича, мамлакат Ғарбий соҳилда янги манзилгоҳлар қурилиши ва кенгайтирилишига кескин қаршидир. У машҳур E1 лойиҳасини Фаластин ерларининг ҳудудий яхлитлиги ва тинчлик жараёнига таҳдид, деб атади. «Исроил ҳукуматини посёлка қурилиши ва кенгайтирилишини тўхтатишга чақирамиз. Янги воқеликлар яратиш уринишлари икки давлат ечимини йўққа чиқаради», — деди Балакришнан.
У санкциялар тафсилотлари кейинроқ эълон қилиниши ҳақида ҳам маълум қилди. Фаластин давлатини тан олиш масаласига тўхталар экан, вазир бу фақат вақт масаласи эканини қайд этди: «Бу «қачон» деган савол, асло «ҳеч қачон» дегани эмас. Лекин зарур шартлар — самарали Фаластин ҳукумати ва Исроилнинг мавжудлигини тан олишдир».
Айни пайтда Сингапур Осиё қитъасида Фаластин давлатини тан олмаган кам сонли давлатлардан биридир.
Балакришнанга кўра, муаммони ҳал қилишнинг ягона йўли — икки давлат ечими. «Фақат музокаралар орқали Исроил ва Фаластин бир-бирининг ёнида тинчлик ва хавфсизликда яшаши мумкин», — деди у.
Эслатиб ўтамиз, ўтган йили Сингапур БМТда Фаластин давлатчилигини тан олишга қаратилган бир қатор резолюциялар учун овоз берган эди. Бу мамлакатнинг позицияси ўзгараётганидан ва оккупация қилинган ҳудудлардаги изроиллик зўравонликка нисбатан халқаро норозиликнинг ортиб бораётганидан далолат беради.