Бугун, 23 сентябр куни АҚШ президенти Доналд Трамп БМТ Бош Ассамблеясидаги нутқида лавозимига киришганидан буён еттита урушни тўхтатганини, бу можароларни ҳал қилиш эса БМТнинг вазифаси эканлигини таъкидлади. Унинг айтишича, ташкилот «улкан салоҳиятга» эга, бироқ ундан фойдаланмаяпти.
«БМТдан менга ҳеч ким қўнғироқ қилиб, ёрдам таклиф қилмади. БМТдан олганим фақат ишламаётган эскалатор ва ишламаётган телесуфлёр, холос. БМТнинг мақсади нима ўзи? Ташкилотнинг улкан салоҳияти бор, мен буни доим таъкидлайман, лекин у бу салоҳиятни ҳеч бўлмаганда ҳозирча ҳатто яқинлашиб ҳам рўёбга чиқармаяпти», — деди Доналд Трамп БМТ Бош ассамблеясидаги нутқи пайтида.
АҚШ президенти ўз иштироки туфайли ҳал этилган жаҳон можаролари ҳақида сўзлар экан, қуйидаги мамлакатларни санаб ўтди: Камбоджа ва Таиланд, Косово ва Сербия, Конго ва Руанда, Покистон ва Ҳиндистон, Исроил ва Эрон, Миср ва Эфиопия, Арманистон ва Озарбайжон.
«Афсуски, барча ҳолатларда БМТ ҳатто ёрдам беришга уриниб ҳам кўрмади», — дея таъкидлади Америка раҳбари.
Унинг таъкидлашича, БМТ нафақат муаммоларни ҳал қила олмайди, балки янгиларини яратади. Улардан энг жиддийси ноқонуний миграциядир.
«БМТ дунёнинг нариги томонидан тинч мамлакатларга ноқонуний муҳожирларнинг бостириб киришини молиялаштирмоқда», — дея қўшимча қилди у.