Исроил армияси Ғазо шаҳри марказига етиб борди. Бу ҳақда BBC тасдиқлаган видеолавҳалар ва маҳаллий манбалар хабар берди. Ҳарбийлар Ғазони ҲАМАСнинг «сўнгги таянчи» сифатида атаб, операциянинг асосий мақсади жанговар гуруҳни йўқ қилиш ва ҳали тирик дейилаётган 20 та асирни озод қилиш, шунингдек, ҳалок бўлган 28 нафар исроилликнинг жасадини қайтариш эканини маълум қилди.
Тасдиқланган видеода танк шаҳарнинг Ҳамид чорраҳасида кўринади. Бу жой шаҳар марказидаги энг йирик тиббий муассаса — «аш-Шифо» шифохонасига тахминан 1,5 километр масофада жойлашган. Reuters эса маҳаллий гувоҳларга таяниб, Исроил танклари турар-жой кварталларига кириб боргани, аҳолини уйларида қамаб қўйгани ва айрим зирҳли машиналар БМТнинг шаҳар марказига яқин ҳудудида ҳам кўринганини хабар қилди.
ҲАМАСнинг бир манбаси BBCга шаҳарга минглаб жангчиларни жалб қилиш режаси борлигини маълум қилди. Бу маълумот тўғри бўлса, шаҳар кўчаларида қонли тўқнашувлар ва кенг кўламли уруш хавфи ортмоқда. Шу билан бирга, Ғазода ҳали ҳам минглаб тинч аҳоли қолгани ҳуманитар оқибатларни янада оғирлаштириши мумкин.
Исроил расмийлари асирларни озод қилиш мақсадини таъкидлаётган бир пайтда, халқаро ташкилотлар тинч аҳоли тақдири, эвакуация йўлларининг ёпилиши ва тиббий ёрдам имкониятлари кескин чекланиб қолаётганидан огоҳлантирмоқда. Уруш хуружлари нафақат қурол билан, балки яшаш учун зарур инфратузилмаларни вайрон қилиш орқали ҳам давом этмоқда.