Украина ва Сурия 2025 йил 25 сентябрда дипломатик алоқаларни тиклаш бўйича келишувга эришди. Украина президенти Володимир Зеленский БМТ Бош Ассамблеяси доирасида Суриянинг муваққат президенти Аҳмад Аш-Шараъа билан учрашувдан сўнг бу ҳақда маълум қилди.
Зеленский: «Бугун Украина ва Сурия дипломатик алоқаларини тиклаш бўйича қўшма коммюнике имзолади. Биз ушбу муҳим қадамни олқишлаймиз ва Суриянинг барқарорлик йўлида ёрдам беришга тайёрмиз.» — деб ёзган ўзининг Х ижтимоий тармоғида.
Зеленскийга кўра, учрашувда хавфсизлик таҳдидлари, икки давлат ўртасидаги истиқболли ҳамкорлик йўналишлари ва уларнинг ривожланиши муҳокама қилинган ва муносабатларни ўзаро ҳурмат ва ишонч асосида мустаҳкамлашга келишилган. Украина 2022 йилда Суриянинг ўша вақтдаги президенти Башар Асад Донетск ва Луганскни мустақил давлатлар сифатида тан олганидан сўнг Дамашқ билан дипломатик алоқаларни узган эди. Шундан кейин, Сурия ҳам Киев билан алоқаларни тўхтатганини эълон қилган эди.
Маълумот учун, Аш-Шараъа, 21 сентябрда БМТ Бош Ассамблеясида иштирок этиш учун Ню-Ёркка борган эди. Бу Сурия президенти учун қарийб 60 йил ичида муҳим сиёсий учрашувларда биринчи иштирок этишидир.