Президент Шавкат Мирзиёев 24 сентябрь куни Американинг етакчи университетларида таҳсил олаётган ўзбекистонликлар ва «Эл-юрт умиди» жамғармаси стипендияси совриндорлари билан учрашувда АҚШ президенти Доналд Трамп билан учрашуви якунлари ҳақида гапириб ўтди.
Шавкат Мирзиёев АҚШ президенти билан «жуда яхши учрашув» бўлиб ўтгани, суҳбатда жуда кўп масалалар келишиб олинганини таъкидлаб, Доналд Трампнинг Ўзбекистон ҳақида ижобий фикрда эканини айтди.
«Ҳаммангизнинг хабарингиз бор, 5 сентябрь куни Америка таклифига биноан Трамп жаноблари билан жуда мазмунли суҳбатимиз бўлган эди. У суҳбатда биз, албатта, учрашишимизни айтди. Мен Ўзбекистон тўғрисида билар эдим-у, лекин бунчалигини билмасдим,деди. Кеча жуда яхши учрашув бўлди. Жуда кўп масалаларни келишиб олдик. Тwиттеръда ёзилганларини ўқигансизлар, албатта. Ўзбек халқи айтади ва қилади, биз шунга ишонтирдик», — деди Шавкат Мирзиёев.
Президент бундай учрашувлар ва музокаралар мамлакат учун янги истиқболларни очиб беришини алоҳида таъкидлади.
«Бир нарсани билинглар, кечаги тарихий учрашувларимиз эртага сизларга кўп нарсага йўл очади. Дунёда энг катта иқтисодиёт бўлган Америкада биз билан учрашган компанияларни ўзларинг кўрдинглар. Трампнинг олдидаги раҳбарлари айтди, агар бизга Трамп топшириқ бермаганида бундай компания раҳбарини йиға олармидик, йўқми, деган гапни ҳам айтди. Улар нима учун бизга интиляпти? Бизнинг имкониятларимиз жуда катта. Ҳамкорларимиз билан рақобатбардош, қўшимча қийматли маҳсулотларни ишлаб чиқсак, албатта, бозор топамиз», — деди у.
Шунингдек, Президент ёшларга қарата: «Денгиздан узоқроқ жойлашганмиз. Учта-тўртта мамлакатдан ўтиб денгизга боришимиз учун битта кўприк бор — ёшларнинг билими. Яқинда мис конини очамиз. Бошлаганимизда 72 минг тонна мис ишлаб чиқарар эдик, ҳозир 158 минг тоннага етди. Яқинда очадиган фабрикамиз 150 минг тонна мис беради. Биз бу билан тўхтамаймиз. МБФ-3 (Мис бойитиш фабрикаси), МБФ-4, МБФ-5 ва МБФ-6ни ҳам режалаштиряпмиз. Бу ҳаракатларнинг пировард мақсади ватанимизни келажагини фаровонлигини таъминлаш ва албатта бу фаровонликни сизларсиз қилиб бўлмайди.» — деган.
Эслатиб ўтамиз, Ўзбекистон президенти 23 сентябрь куни Ню-Ёркда АҚШ президенти билан учрашган эди.