Журналист ва жамоатчилик фаоли Ирина Матвиенконинг билдиришича, Швейцариядан қайтарилган ва Ўзбекистон халқига тегишли бўлган юз миллионлаб долларлар «Ишонч» фонди орқали турли лойиҳаларга йўналтирилмоқда. Фонд котибияти томонидан 2024 йилда ишлатилган 2 млн доллардан ортиқ маблағ жамоатчилик эътиборини тортди.
Фонд котибияти раҳбари Йонас Аструпнинг таъкидлашича, котибият учун ҳар йили тахминан 1,1 млн долларлик бюджет тасдиқланган, аммо тўлиқ ишлатилмаган. Унинг айтишича, 2022–2024 йиллар оралиғидаги умумий харажатлар бор-йўғи икки йиллик бюджетга тенг.
Шу билан бирга, Ишонч фондининг Фуқаролик жамияти маслаҳат кенгаши аъзолари молиявий ҳужжатларни кўриш талаби билан чиқишган. Улар маошлар, шартномалар ва харажатлар бўйича аниқ маълумот сўрашган. Аммо, сўралган ҳужжатлар тақдим этилмаган. Жавоб сифатида БМТнинг харидлар веб-сайтига мурожаат қилиш тавсия этилган. Лекин бу сайтда эса сўралган маълумотлар мавжуд эмас.
Кейинроқ, маблағлар бошқаруви котибият ихтиёрида эмаслиги, бу масъулият административ агентга юклатилгани айтилди. Ушбу агент Швейцария ҳукумати билан келишувни имзолаган. Учинчи томон билан учрашув таклиф этилган бўлса-да, ҳеч қандай молиявий ҳужжатларсиз бундай учрашув мазмунсиз ҳисобланади.
Таъсирчан ва очиқ бошқарувга ваъда берилгани ҳолда, ижтимоий назоратда қатнашувчи фаоллар ҳануз асосий молиявий маълумотларга эга эмаслар. Уч йилда 2 миллион доллардан ортиқ маблағ фақат котибият фаолиятига сарфлангани. Евроиттифоқнинг фуқаролик жамияти лойиҳаларига ажратган 300–400 минг евролик грантлари билан солиштирилганда, мутлақо номутаносиб кўринади. Бу маблағлар на Швейцарияга, на БМТга тегишли. Улар Ўзбекистон халқиники ва ҳар бир центи қаерга ишлатилаётгани юзасидан жавобгарлик талаб қилинади.
Ҳозирча эса ҳатто назорат органлари ҳам аниқ маълумотдан бехабар қолмоқда.
Яна бир жамоатчилик фаоли, фан доктори Камола Алиева Гулнора Каримовадан қайтарилган пулларнинг 94,8 милн доллари «Ishonch» фондига тушгани, бу сумманинг 67 млн доллари бугунги кунда соғлиқни сақлаш ва таълим йўналишидаги йирик лойиҳалар учун ажратилгани ҳақида ёзган.
Шундан, 43,5 млн доллари соғлиқни сақлаш лойиҳасига аёллар ва чақалоқлар ўлимини камайтириш мақсадида ажратилиб, республика бўйлаб 227 та перинатал марказ оналар ва чақалоқлар саломатлиги учун зарур шароитлар билан жиҳозланяпти. 23,5 млн доллари эса таълим лойиҳасига ажратилди дея хабар берган.