Россия Хитойга ҳаво-десант бўлинмалари учун технологиялар, жанг тажрибаси ва ҳарбий техникаларни етказиб бермоқда. Таҳлилчиларнинг фикрича, бу Пекиннинг Тайванга тез ҳужум қилиш имкониятини ошириши мумкин. Бу ҳақда The Washington Post хабар қилмоқда.
The Washington Post маълумотларига кўра, 2024 йил октябрида Москва 37 та БМД-4М десант жанговар машинаси, 11 та «Спрут-СДМ1» ўзиюрар танкка қарши қурол, 11 та БТР-МДМ зирҳли транспортёр, шунингдек, оғир техникани десантлаш учун парашют тизимлари етказиб бериш бўйича шартнома имзолаган. Битимнинг дастлабки қиймати 580 миллион доллардан ошган.
Техникадан ташқари, Россия Хитой десантчиларини тайёрлашга, жумладан, қуролларни жангда қўллаш ҳамда қўмондонлик ва бошқарув тизимларидан фойдаланишни ўргатишга розилик берган. Машғулотларнинг бир қисми Россия полигонларида, кейинчалик эса Хитойда ўтказилиши кўзда тутилган.
RUSI (Буюк Британиядаги ҳарбий-сиёсий таҳлил маркази) таҳлилчилари фикрига кўра, бундай ҳамкорлик Пекинга Тайван, Филиппин ва минтақадаги бошқа орол давлатларига қарши ишлатилиши мумкин бўлган «ҳаво маневрлари учун кенгайтирилган имкониятлар» беради.RUSIнинг қуруқликдаги урушлар бўлими катта илмий ходими Жек Уотлинг таъкидлашича, бу «русларнинг хитойликлар учун воситачи бўлганига жуда яхши мисол. Москва ва Пекин хавфсизлигига бўлган таҳдидлар энди деярли ажралмас ҳолга келган».
Шунингдек, RUSI ҳисоботида қайд этилишича, икки армия ўртасидаги ҳамкорлик рамзий қўшма машғулотлар доирасидан анча ташқарига чиқиб, Си Жинпингнинг АҚШга қарши тура оладиган замонавий қуролли кучларни яратиш стратегиясини қўллаб-қувватлашга қодир тизимларни шакллантирмоқда.
Расмий Тайбей Хитойга десант қўшинларини бошқаришнинг энг сўнгги тизимларини ўтказилишини кузатаётганини тасдиқлади. Исмини ошкор қилишни истамайдиган Тайван разведкаси вакили Хитой ва Россия ўртасидаги ҳарбий ҳамкорлик оммавий эътироф этилганидан анча кенг кўламли эканлигини маълум қилди.
Мутахассисларнинг баҳолашича, санкциялар туфайли икки мақсадли маҳсулотлар етказиб беришда Пекинга қарам бўлган Москва, айни пайтда ХХРга Тайванга қарши бўлиши мумкин бўлган операцияга тайёргарлик кўришида кўмаклашмоқда. Келажакдаги тўқнашувда Россия Хитойни энергия ресурслари ва технологиялар билан таъминлайдиган стратегик таянч нуқтасига айланиши мумкин.
Шунингдек, The Washington Post газетаси ёзишича, Хитойнинг ҳарбий устунлигига қарамай, Тайванга кенг кўламли босқин ҳамон хатарли бўлиб қолмоқда: муваффақиятга эришиш учун юз минглаб ҳарбий хизматчиларни чекланган сондаги қўниш нуқталарига тезда кўчириш ва айни пайтда АҚШ ҳамда унинг иттифоқчиларини аралашишдан тўхтатиб қолиш зарур. «Тайван билан бирлашиш»ни бир неча бор «миллий тикланиш»нинг бир қисми деб таърифлаган Си Жинпинг Халқ озодлик армиясига модернизацияни жадаллаштириш ва «ғалаба қозониш лозим бўлган урушларга» тайёргарлик кўришни буюрган.