Британиянинг The Telegraph нашрининг ёзишича, Украина Россиянинг нефт инфратузилмасига йўналтирган зарбалари ортидан мамлакатда ёқилғи танқислиги ва иқтисодий қийинчиликлар кучайган.
Москва, Қрим ва Шарқий минтақаларда автомобилларга ёнилғи қуйиш шохобчаларида узундан узун навбатлар пайдо бўлди, бензин ва дизел нархлари ошган ва ҳукумат уларни нормалаштириш чораларини жорий этди. Экспертларнинг фикрича, Украина дронлари нефт қайта ишлаш заводлари, қувурлар ва порт терминалларига урилиб, қайта ишлаш ҳажмини айрим кунларда 20 фоизга қадар қисқартиришга эришган.
Бундай зарбалар Россиянинг экспорт имкониятларини чеклаб, Кремл учун урушни молиялаштиришда қийинчилик туғдирмоқда. Шунингдек, нефт базалари ва насос станцияларига қилинган ҳужумлар аҳоли ва бизнес орасида норозиликни оширмоқда.
Россия энергетика вазири Александр Новак муаммони «кичик танқислик» деб баҳолади, аммо таҳлилчилар вазият аҳоли ва бизнес учун жиддий таъсир кўрсатаётганини таъкидламоқда.
Энергетика бўйича эксперт Люк Викенден таъкидлашича, дронлар ички таъминот учун масъул объектларга йўналтирилган. Натижада, Россия бўйлаб ёқилғи тақчиллиги кузатилмоқда ва бу ички мувозанатни янада издан чиқариши муқаррар.
АҚШ ва Европа Иттифоқи Кремлга босимни кучайтиришда давом этмоқда. Дональд Трамп Европани Россия энергетика маҳсулотларидан бутунлай воз кечишга чақирди. ЕИ эса 2026 йил охирига қадар газ импортини тўлиқ тўхтатиш режасини жадаллаштирмоқда.
Экспертлар Украина ҳужумларини Россиянинг ҳарбий бюджетига энг самарали «санкциялар» сифатида баҳоламоқда, чунки улар тез ва бевосита таъсир кўрсатмоқда. Шу билан бирга, Россия иқтисодиёти ҳали санкцияларга бардошли бўлса-да, ёнилғи танқислиги ва етказиб беришдаги узилишлар Путин учун ички босимни кучайтираётгани таъкидланди.