Украина ҳарбийлари маълумотича, Россия бир кечада 595 та дрон ва 48 та ракетани учирган, улардан катта қисми Киевни нишонга олган. Ҳаво ҳимоя тизимлари 568 та дрон ва 43 та ракетани йўқ қилган. Ҳужум 12 соатдан зиёд давом этиб, шифохона, заводлар ва турар-жой биноларига зарар етгани айтилмоқда.
Президент Володимир Зеленский бу ҳужумни уруш бошланганидан бери пойтахтга қилинган энг катта зарбалардан бири, деб атади. Унинг сўзларига кўра, асосий мақсад Украина инфратузилмаси ва фуқароларнинг иродасини синдириш бўлган. Зеленский халқаро ҳамжамиятни Россиянинг энергиядан оладиган даромадларини чеклаш учун қатъий чора кўришга чақирди.
Москва эса ҳужумлар ҳарбий-саноат объектларига қаратилганини маълум қилди. Шу билан бирга, юзлаб уйлар вайрона бўлиб, кўплаб аҳоли метро станцияларига жойлашди. Reuters мухбирлари Киев атрофидаги айрим турар-жой массивлари бутунлай вайронага айланганини қайд этди.
Ҳужумлар Украина ҳаво ҳимоя тизимини янада қийин аҳволга солди. Зеленский Исроилдан Patriot тизими келганини, яқин орада яна иккиси етиб келишини айтди. Бироқ ресурслар чеклангани ва дунёдаги бошқа давлатлар ҳам ўз хавфсизлигини мустаҳкамлаётгани Украина учун вазиятни оғирлаштирмоқда.
Зарар кўрган ҳудудлар орасида Запорожже ҳам бор. У ерда камида 16 киши яралангани маълум қилинди. Умумий ҳисобда мамлакат бўйлаб 67 киши яраланган, 4 киши вафот этган.
Аввалроқ Зеленский урушдан кейин президентликдан кетишга тайёр эканлигини маълум қилган эди.