Air Samarkand компаниясида вазият яна кескинлашди. SHOT Телеграм каналининг ходимларга таяниб келтиришича, 50 га яқин Россия фуқаролари бўлган ходимлар неча ойдирки маош ололмаяпти. Айримлар ҳатто овқат учун маблағ йўқлигини билдирмоқда. Илгари махсус рапорт орқали озиқ-овқат харажатлари қопланарди, аммо энди бу ҳам бекор қилинган. Шу билан бирга, уй ижараси учун ажратиладиган маблағ ҳам тўланмаяпти.
Борт кузатувчилари ва учувчилар раҳбарият айрим раҳбарларининг ҳурматсиз муносабатидан ҳам шикоят қилмоқда. «Авиакомпанияда энтузиастлар қолгани», кўплаб ходимлар эса ишдан бўшаб кетганини таъкидлашмоқда.
Компаниянинг изоҳига кўра, маош муаммолари буюртмачиларнинг ўз вақтида тўлов қилмагани билан боғлиқ. Улар ҳалигача компанияга керакли маблағларни тўлиқ ўтказмагани айтилмоқда.
Air Samarkand’da бу илк бор кузатилаётган ҳолат эмас. 2024 йилда ҳам ходимлар, айниқса Россиядан жалб қилинган мутахассислар маош кечикишидан норози бўлишган эди. Ўшанда 75 киши ишдан бўшаган, катта қисми эса қисқартириш асосида кетган.