Telegram мессенжери 2024 йилда 1,4 млрд долларлик рекорд даромадга эришиб, 540 млн доллар соф фойда қайд этди. Бу кўрсаткич ўтган йилга нисбатан 400 фоиз ўсишни англатади. 2023 йилда компания биринчи марта 173 млн доллар фойда кўрган эди.
Компания ўз натижаларини янги инвесторларга тақдим этиб, 1,5 млрд долларлик облигациялар чиқариш орқали мавжуд қарзларини қайта молиялаштиришни мақсад қилган. Облигация сотуви аллақачон бошланган ва яқин ҳафтада якунланиши кутилмоқда.
Telegram’нинг бундай муваффақиятининг сабабларидан бири — платформадаги тўловли фойдаланувчилар сонининг ўсиши ва криптовалюта билан боғлиқ ҳамкорликлардир. Шу билан бирга, Францияда Павел Дуровга нисбатан олиб борилаётган терговлар компаниянинг оммалашишига таъсир қилмаётгани таъкидланмоқда.
2023 йил августида Дуров Парижда ҳибсга олинган ва у Telegram орқали жиноятчилик, хусусан, болаларга нисбатан жинсий зўравонлик ва терроризмга қарши етарли чора кўрмаётганликда айбланмоқда. Унга қамоқ жазоси ҳам таҳдид солмоқда.
Дуров, Франция, Россия ва БАА фуқаролигига эга бўлиб, бу айбловларни рад этмоқда. Унинг таъкидлашича, болаларга нисбатан жинсий зўравонлик масаласи фақатгина баҳона бўлиб, аслида бу ишда геосиёсий мақсадлар турибди.