2025 йил 22 май куни давлат улушларини хусусийлаштириш доирасида «Avtooyna» МЧЖ устав капиталининг 100 фоизи «Uet Invest» МЧЖга 200,5 млрд сўм (ҳозирги курс бўйича тахминан 15,5 млн доллар) эвазига сотилди. Бу ҳақда Давлат активларини бошқариш агентлиги хабар берди.
Мазкур савдода 8 та маҳаллий ва халқаро инвестор иштирок этди, шулардан 4 таси расмий таклифлар тақдим этди. Уларнинг ичида энг юқори нархни таклиф қилган «Uet Invest» ғолиб деб топилди. Компания савдо қоидаларига мувофиқ, тўловнинг 35 фоизини 1 ой ичида амалга ошириши лозим.
«Uet Invest» — «Uet construction» МЧЖ асосчи ширкати бўлиб, компания акцияларининг 76,95 фоизи Ҳурдиёр Ортиқбоевга, қолган 23,5 фоизи эса асосчи компанияга тегишли. «Uet construction» қурилиш ва саноат инфратузилмаси соҳаларида фаолият юритади.
Шартнома шартларига кўра, харидор 10 йил давомида заводнинг асосий ишлаб чиқариш йўналишини сақлаб қолиши ва «General Motors» билан мавжуд лицензия ва технология шартларига амал қилиши лозим. Бу талаблар халқаро ҳамкорликни сақлаб қолиш ва технология узлуксизлигини таъминлашга қаратилган.
Шу билан, «Avtooyna» давлат улуши белгиланган индикатив нархдан юқори баҳода сотилиб, хусусийлаштириш жараёни самарали якунланди. Давлат, ушбу шартнома орқали, маҳаллий инвестиция ва саноатни ривожлантиришда муҳим қадам ташлади.