АҚШ президенти Доналд Трамп Қўшма Штатлар Қуролли кучлари олий қўмондонлик таркиби олдида сўзлаган нутқида Россия Федерацияси Хавфсизлик кенгаши раисининг ўринбосари Дмитрий Медведевга нисбатан кескин фикр билдириб, уни «аҳмоқ одам» деб атади. Шунингдек, Трамп иккита сув ости кемасини «Россия қирғоқлари томон» йўналтириш ҳақида фармойиш берганини маълум қилди.
«Россия бизга яқинда озгина таҳдид қилган эди. Мен эса яратилган энг ҳалокатли қурол – атом сув ости кемаларини [Россия қирғоқларига] жўнатдим. Буни у ядровий сўзини тилга олгани учун қилдим… Бу [сўзни] [Путин] учун ишлайдиган аҳмоқ одам айтган эди», – деди Трамп Пентагон раҳбари Пит Хегсет томонидан ташкил этилган Америка генералитети иштирокидаги йиғилишда. Тадбир АҚШ денгиз пиёдалари корпусининг Куантикодаги (Виржиния штати) базасида ўтказилди.
«Мен бир ёки иккита сув ости кемасини – иккитаси ҳақида айтмайман – Россия соҳилларига фақат эҳтиёткорлик юзасидан жўнатдим. Биз одамларнинг ядрj сўзини бемалол ишлатишига йўл қўя олмаймиз», – дея таъкидлади Трамп.
Унинг айтишича, АҚШ сув ости кемаларини ишлаб чиқариш технологияларини ривожлантиришда «Россия ва Хитойдан 25 йил олдинда».
Илгари АҚШ президенти Truth Social ижтимоий тармоғида Россия Федерацияси Хавфсизлик кенгаши раис ўринбосари Дмитрий Медведевнинг фикрлари туфайли Американинг иккита атом сув ости кемасини тегишли ҳудудларга кўчириш тўғрисида буйруқ берганини маълум қилган эди. Трампнинг фикрича, Медведев ядровий мавзуда таҳрикловчи баёнотлар билан чиққан.