The New York Times манбаларнинг таъкидлашича, ташаббусни Давлат котиби ва миллий хавфсизлик бўйича маслаҳатчи Марко Рубио бошқармоқда. Унинг фикрича, Мадуро легитим эмас, наркотрафикда иштирок этган ва АҚШ учун хавфли бўлган жиноий тузилмани бошқаради. Бу ғояларни Марказий разведка бошқармаси (МРБ) директори Жон Рэтклифф ва ички сиёсат бўйича маслаҳатчи Стивен Миллер қўллаб-қувватламоқда.
АҚШ Давлат департаменти Мадурони қўлга олишга олиб келадиган маълумот учун мукофотни 50 млн долларгача оширди. «У қонуний раҳбар эмас, Америка қонунларидан қочиб юрибди ва минтақавий хавфсизликка таҳдид солмоқда», — деди Давлат департаменти вакили Томми Пиготт.
NYT манбаларига кўра, Пентагон Венесуэлага қарши турли ҳарбий сценарийларни кўриб чиқмоқда, бироқ охирги тасдиқ ҳали берилмаган. Доналд Трамп эса БМТда сўзлар экан, «Мадуро ва унинг наркотармоқларига қарши АҚШ армияси қудрати ишлатилмоқда», деб баёнот берган.
Июлда Трамп наркокартелларга қарши куч ишлатишни рухсат этувчи махфий фармон имзолаган. АҚШ Кариб денгизида ҳарбий ҳузурини кучайтирди, бир неча ҳафта ичида Венесуэла наркобизнеси билан боғлиқ кемалар йўқ қилинди. Расмийларга кўра, 2 сентябрдан бери камида 17 киши ҳалок бўлган.
Шу билан бирга, АҚШ Венесуэлада сиёсий алмашинув учун ҳам тайёргарлик кўрмоқда. Рубио мухолифат етакчилари билан учрашиб, Мадуро кетганидан кейинги 100 соат учун ҳаракат режасини муҳокама қилган. Унда ҳокимият Эдмундо Гонсалесга ўтиши кўзда тутилган.
Халқаро ҳуқуқ нуқтайи назаридан, БМТ розилигисиз ҳарбий аралашув ноқонуний ҳисобланади. Аммо АҚШ Гонсалесни қонуний президент сифатида тан олгани учун, унинг сўрови Вашингтонга ҳарбий амалиётни асослаш имконини бериши мумкин. АҚШ расмийси буни Панамада 1989 йилда Нориегага қарши операцияга қиёслади.