«Коммерсантъ» нашрининг ёзишича, бензин импорт қилиш учун ҳукумат махсус пакет тайёрлади. Узоқ Шарқ орқали кириб келадиган ёқилғиларга божхона тўловлари бекор қилинади, импортёрларга эса давлат нархлар фарқини бюджетдан қоплаб беради.
Ёқилғи етказиб бериш ҳуқуқини «Роснефт», ННК ва «Промсирёимпорт» компаниялари олади. Бу марказий Россияга ҳар ой 150 минг тонна Сибир бензини йўналтириш имконини беради. Шу билан бирга, ҳукумат Беларусдан импортни кўпайтириш ҳамда 2016 йилдан бери тақиқланган монометиланилин (ММА) қўшимчасидан фойдаланишга рухсат беришни режалаштирмоқда.
Сентябр ойи охирига келиб, мамлакатда рекорд даражада — 38 фоиз НҚИЗ қувватлари тўхтаб қолди. Бунга асосан Украина дронлари ҳужумлари сабаб бўлди. Фақат августдан буён 20 дан ортиқ йирик завод ишдан чиқарилди. Сўнгги ҳафтада «Кинеф», Рязан, Новокуйбишев ва Астрахан заводлари ҳам тўхтаб қолди. Бугун эрталаб катталиги бўйича Россияда бешинчи ўринда турувчи Ярославл НҚИЗга ҳам ҳужум уюштирилган ва ката ёнғин келиб чиққан.
Бундай ҳужумлар натижасида, Сахалиндан тортиб Қримгача бўлган ҳудудларда ёқилғи тақчиллиги юзага келди. Масалан, Қримда бир қўлга 30 литрдан ортиқ бензин сотиб олиши тақиқланди.
Россия ҳукумати Осиё ва Беларусдан импорт, шунингдек экологик талабларни юмшатиш орқали ички бозорга қўшимча 350 минг тонна бензин ва 100 минг тонна дизел олиб кириш режасини кўриб чиқмоқда.