Apple компанияси жорий йилнинг сентябр ойида янги дизайндаги iPhone 17 смартфонларини тақдим қилди. Ўзбекистонда ҳам уларнинг сотуви аллақачон бошланган. «Банкир» Телеграм-канали асосчиси ўзбекистонликлар ўртача неча-кун емай-ичмай ишласа Iphone 17 олиши мумкинлигини ҳисоблаб чиқди.
Янги тақдим қилинган iPhone 17 Air нархлари «Малика» бозорида 1 520 доллардан сотилмоқда.
17 pro нархлари 1 650 доллардан, 17 pro max нархлари эса 2 100 доллардан бошланган.
Мамлакатда ўртача иш ҳақи 6 миллион сўм атрофида. Доллар курсини 12 200 сўмдан ҳисоблаганда, ўртача ишчига 17 Air харид қилиш учун 93 кун ишлашига тўғри келади. Албатта, давомадини бошқа ҳеч нарсага сарфламаган ҳолда. Бу кўрсаткич iPhone 17 pro учун 101 кунни, 17 pro max учун эса 128 кунни ташкил қилади.
Ўтган йили ўртача ўзбекистонлик iPhone 16 pro max олиши 154 кун ишлаши керак эди. Бироқ у пайтлар доллар курси 12 800 сўм атрофида бўлган.
Ўртача ойлик ҳам бироз ошди. Аммо кунлар қисқаришига доллар курсининг қадрсизланаётгани сабаб бўлди, холос. Одамларнинг ойлик ўртача даромади кескин ошиб кетгани йўқ!
Рақамлар касбларга қараб ҳам фарқ қилади. Ўқитувчига 17 pro max олиши учун ўртача 185 кун керак бўлса, банкирлар учун анча камроқ — 47 кун кифоя қилади.
Нархлар бир неча ҳафтадан сўнг пасаяди. Бироқ шунда ҳам iPhone нархлари ўтган йилгидан анча юқори бўлиб қолади.
Америкада iPhone’ни нисбатан арзон олиб келиш мумкин, аммо минг доллардан ошган харидлар учун Ўзбекистонда 30 фоиз бож ҳам бор.