22 май куни нефт нархлари 1,5 фоиздан кўпроқ тушди. Brent фючерслари баррели 63,72 доллар, WTI маркасининг нархи эса 60,44 долларгача пасайди. Reuters агентлигининг ёзишича, бунга OPEC+ ташкилотининг июл ойида қазиб олишни янада ошириш масаласини муҳокама қилаётгани сабаб бўлмоқда.
Bloomberg’га кўра, ташкилотда кунига 411 минг баррел қўшимча қазиб олиш каби вариантлар кўриб чиқилмоқда. Таҳлилчилар буни бозорда улуш учун кураш стратегиясининг бошланиши сифатида баҳоламоқда. Onyx Capital Group мутахассиси Гарри Чилигирян буни «бир ҳаракатда зирапчани олиб ташлашга ўхшайди», деб изоҳлади.
Айни пайтда, АҚШдаги нефт захиралари ҳам ортиб бормоқда. Энергетика ахборот бошқармаси (EIA) маълумотига кўра, 16 майгача бўлган ҳафтада захиралар 1,33 млн баррелга кўпайиб, 443,2 млн баррелга етди. Бу маълумотлар, айниқса, WTI нархига салбий таъсир кўрсатмоқда.
LSEG Oil Research таҳлилчиси Эмрил Жамилнинг таъкидлашича, АҚШдаги захиралар ўсиши мамлакатнинг Европага ва Осиёга экспорт ҳажмини ошириши мумкин.
Янги геосиёсий хавфлар ҳам нархларга таъсир қилмоқда. CNN хабарига кўра, АҚШ разведкаси Исроилнинг Эрон ядровий объектларига зарба беришга тайёргарлигини қайд этган. Бу эса куни кеча нефт нархларининг қисқа муддатли кўтарилишига сабаб бўлганди.