2 октябрь куни Ўзбекистоннинг Жанубий Африка Республикасидаги биринчи элчиси Ашраф Хўжаев Претория шаҳрида Президент Сирил Рамафосага ишонч ёрлиқларини топширди. ЖАР Президенти матбуот хизмати хабар берди.
Маросим Сефако Макгато президент меҳмонхонасида бўлиб ўтди. Шу билан Ўзбекистон ва ЖАР ўртасидаги дипломатик муносабатларда янги босқич бошланди.
44 ёшли Ашраф Хўжаев Тошкент давлат шарқшунослик институти, Ўзбекистон Миллий университети ҳамда Пекин университетини тамомлаган. У иқтисодиёт фанлари номзоди (Phd) даражасига эга.
У ўз дипломатик фаолиятини 2005 йилда Ташқи ишлар вазирлигида референт сифатида бошлаган. Кейинчалик БМТдаги доимий вакиллик ҳамда Буюк Британиядаги элчихонада турли лавозимларда ишлаган.
2018 йилдан бошлаб Хўжаев Ташқи ишлар вазирлигида иқтисодий дипломатия йўналиши бўйича бош бошқарма бошлиғи ҳамда директор лавозимларида фаолият юритди. 2024 йилда эса Ўзбекистоннинг Қатардаги биринчи элчиси этиб тайинланган эди.