2025 йил 3 октябрда Финляндиянинг Миккели шаҳрида, Россия чегарасига яқин ҳудудда, НАТОнинг Шимолий Европадаги қуруқлик қўшинлари штаби расман ишга тушди. Маросимда Финляндия мудофаа вазири Антти Ҳакканен ва НАТО вакиллари иштирок этди.
Ҳакканеннинг сўзларига кўра, мамлакат ҳудудий хавфсизлигини таъминлаш ва минтақада қўшинларнинг ўзаро мувофиқлигини кучайтириш Финляндия учун устувор вазифалардан бири ҳисобланади. Унинг таъкидлашича, Финляндиянинг позицияси НАТОда эътиборга олинаётгани давлат учун муҳим аҳамиятга эга.
Санкт-Петербургдан тахминан 300 километр узоқликда жойлашган штаб сентябр ойи бошидан иш бошлаган. НАТО қўмондонлиги вакили, бригадир генерал Крис Жент маълум қилишича, тинчлик шароитида тузилма аъзо давлатлар ҳаракатларини режалаштириш, машғулот ва қўшма тадбирларни ташкил этиш билан шуғулланади. Агар ҳарбий можаро юзага келса, у Шимолий Европадаги НАТО кучлари устидан тўғридан-тўғри назоратни ўз қўлига олади.
Штабга Норвегиялик Ове Стаурсет ва Финляндия армияси қўмондони генерал-лейтенант Паси Вялимяки раҳбарлик қилади. Ушбу тузилма АҚШнинг Норфолк шаҳрида жойлашган НАТОнинг олий қўмондонлигига бўйсунади.
Миккелидаги янги марказда аллақачон етти давлат – Финляндия, Швеция, Норвегия, Дания, Нидерландия, АҚШ ва Буюк Британиядан келган офицерлар фаолият бошлаган. Тузилманинг доимий ходимлари сони тинчлик даврида 50 нафарга яқин бўлиши режалаштирилган.