Эрон президенти Эрон президенти Масъуд Пизишкиён мамлакат қурғоқчилик, шаҳарларнинг кенгайиши, кучли сув танқислиги ва чўкиш хавфи ортиб бораётгани сабабли пойтахтини Теҳрондан жанубга кўчиришга мажбур эканини айтди.
Унинг сўзларига кўра, у ўтган йили олий раҳбар Али Хоманаийга пойтахтни кўчириш таклифини киритган. Бу ғоя танқидга учраган бўлса-да, Пизишкиён ўсиб бораётган ресурс инқирози бу ҳаракатни муқаррар қилишини таъкидлади.
Бу ҳақда у Форс кўрфази соҳилидаги Ҳормозган вилоятига ташрифи чоғида баёнот берди.
«Бу минтақа очиқ сувларга тўғридан-тўғри чиқади, демак у савдо-иқтисодий алоқаларни ривожлантириши мумкин. Агар унинг салоҳиятидан фойдаланилса, бу ерда гуллаб-яшнаётган ва замонавий марказ барпо этилиши мумкин. Келажак учун илмий асосланган режа ишлаб чиқмасдан туриб, ҳозирги вазиятни оддийгина қабул қилиб бўлмайди», – деди президент.
Унинг таъкидлашича, Теҳрон, Караж ва Қазвин аллақачон жиддий сув инқирозига дуч келган ва уни оддий чоралар билан ҳал қилиб бўлмайди. Теҳронда 10 миллиондан ортиқ аҳоли истиқомат қилади ва бу шаҳар мамлакат сув ресурсларининг деярли чорак қисмини ташкил қилади.
Аввалроқ бошқа президентлар пойтахтни кўчириш масаласини кўтарган эди, жумладан, Ҳасан Руҳоний ҳам вариантлар билан режа тайёрлаган эди. Аммо Олий Раҳбар ташаббусни қабул қилишдан бош тортган.
Пизишкиённинг эслатишича, 2024 йилда ёғингарчилик нормаси 260 мм га нисбатан атиги 140 мм бўлган, 2025 йилда эса бу кўрсаткичлар 100 мм дан пастга тушган.
«Сув омборларидаги сув сатҳининг камайиши, қудуқларнинг қуриб кетиши ва бошқа минтақалардан сув ташиш нархининг юқорилиги ёндашувни ўзгартириш зарурлигидан далолат беради. Теҳронга сув етказиб бериш ҳар бир кубометр учун 4 еврогача бўлиши мумкин», – деб тушунтирди у.
Унинг сўзларига кўра, авваллари сув омборлари пойтахт эҳтиёжларининг 70 фоизини таъминлаган, бироқ ёғингарчиликнинг камлиги ва буғланишнинг кўплиги туфайли уларнинг улуши камайиб, ер ости манбаларига босим кучайиб бормоқда.
«Баъзи ҳудудларда ер йилига 30 см гача чўкмоқда. Бу фалокат ва ер ости сувлари тугаб бораётганидан далолат», – дея огоҳлантирди президент.