Financial Times маълумотларига кўра, Владимир Путиннинг ҳаракатлари АҚШ президенти Доналд Трампнинг асосий маслаҳатчиларининг сабрини тўлдирди. Нашр манбаларига кўра, Вашингтоннинг Украина масаласида кескин позиция ўзгариши шу билан изоҳланади.
АҚШ сентябр ойида Киевга Россия энергетика инфратузилмасига зарбалар учун разведка маълумотларини тақдим этди. Бунинг натижасида мамлакатда бешта йирик нефтни қайта ишлаш заводи ишини тўхтатди. Бензин танқислиги Узоқ Шарқдан Россия марказигача бўлган ҳудудларни қамраб олди.
Маъмурият вакилларининг чиқишлари ҳам тобора кескинлашмоқда. 15 сентябрда АҚШ президентининг махсус вакили Кит Келлог Америка армияси Россия ҳарбийларини «осонликча мағлуб эта олишини» айтди. Бир ҳафта ўтиб эса Трампнинг ўзи Россияни «қоғоз йўлбарс» деб атади. Унинг фикрича, Москва «уч ярим йилдан бери ҳеч қандай мақсадсиз уруш қилаяпти», ҳолбуки ҳақиқий ҳарбий қудратга эга давлат бундай урушни бир ҳафтада якунлаши мумкин эди. Шунингдек, у яқинда АҚШни ядровий қурол билан таҳдид қилган Дмитрий Медведевни «аҳмоқ» деб атади.
Владимир Путин эса бу баёнотларга эътибор қаратмаётгандек кўринаяпти. Сиёсатшунос Аббос Галлямовнинг таъкидлашича, Путиннинг воқеликни инкор этиши «яққол шакл» олган. 2 октябр куни «Валдай» клубида сўзга чиққан Путин АҚШ маъмуриятини «рационал ёндашуви» учун мақтаркан, Европа давлатларини эса урушни чўзиши учун айблади.
«Путиннинг ишлари борган сари ёмонлашмоқда: жанг майдонида ҳарбий зафарлар йўқ, иқтисодиёт инқирозга юз тутаяпти, жамият чарчаган, Украина Қуролли кучлари эса Россия нефт қайта ишлаш соҳасига зарба беришда давом этмоқда. Ҳатто Трамп ҳам риторикасини қатъийлаштирди», — деди Галлямов.
Унга кўра, Путин учун энг муҳим вазифа — «синмаганлик образини кўрсатиш ва олдин қандай ёлғон гапирган бўлса, ҳозир ҳам шундай ёлғон гапираётганини намоён этиш».