Al Jazeera агентлиги хабарига кўра, АҚШ президенти Доналд Трампнинг қаттиқ баёнотидан сўнг ҲАМАС ҳаракати Исроил билан тинчлик келишувини қабул қилишга тайёрлигини билдирди. Гуруҳнинг баёнотида айтилишича, улар барча исроиллик асирларни озод қилиш ҳамда Ғазо сектори бошқарувини халқаро органга топширишга розилик билдиришган.
Бундан ташқари, ҲАМАС етакчиларидан бири Муса Абу Марзуқ Al Jazeera телеканалига берган интервюсида, асирларни озод қилиш ва ўлдирилганларнинг жасадларини қайтариш жараёни 72 соатдан кўпроқ вақт талаб қилишини айтди. У Трамп таклиф қилган муддатни «ҳозирги вазиятда амалга ошмайдиган», деб баҳолади.
ҲАМАС ўз баёнотида Ғазо секторидаги ҳокимиятни фаластинликлар томонидан ташкил этиладиган миллий консенсус асосидаги раҳбариятга топширишга тайёрлигини ҳам билдирди. Бу жараёнда араб ва ислом дунёси кўмаги ҳам кутилмоқда.
Reuters агентлиги эса ҲАМАС тинчлик музокараларини халқаро воситачилар орқали бошлашга тайёр эканини маълум қилди. Бироқ Трампнинг режасида кўзда тутилган Ғазонинг келажаги ва фаластинликларнинг қонуний ҳуқуқларига оид масалалар «миллий бирликка асосланган» ҳолда муҳокама этилиши белгиланди. ҲАМАС ушбу музокараларда масъулиятли иштирок этишини билдирган.
3 октябр куни Доналд Трамп Truth Social тармоғидаги саҳифасида ҲАМАСга мурожаат қилиб, агар улар АҚШ томонидан таклиф этилган тинчлик режасини қабул қилмасалар, уларни «мисли кўрилмаган жаҳаннам» кутяпти, деб баёнот берган эди. Унинг сўзларига кўра, Ғазода қолган ҲАМАС аъзолари тузоққа илинган ва агар келишувдан бош тортишса, «улар топилиб йўқ қилинади».
Трамп ҳафтанинг бошида Ғазодаги урушни тугатиш бўйича ўз режасини тақдим қилган эди. Унга кўра, ҲАМАС 72 соат ичида барча исроиллик асирларни — тирикларини ҳам, жасадларини ҳам қайтариши, Исроил эса 2 мингга яқин ҲАМАС аъзоларини озод қилиши керак эди. Шунингдек, ўт очиш тўхтатилиши, Исроил қўшинларининг босқичма-босқич чиқиб кетиши ва халқаро ташкилот бошчилигида ўтиш ҳукумати ташкил этилиши кўзда тутилган.
ҲАМАСнинг розилигидан сўнг Трамп яна бир баёнот бериб, Исроилни Ғазога зарба беришни дарҳол тўхтатишга чақирди. Унга кўра, «ҳозирги вазиятда асирларни хавфсиз озод қилиш учун бомбардимон қилиш тўхтатилиши керак». Трамп музокаралар бошланганини ва уларнинг муҳокамалари давом этаётганини билдирди.