Санитария-эпидемиология қўмитаси бола эмланганидан кейин тўғри парвариш қилиш ва эҳтиёт чораларини кўриш бўйича янги тавсиялар эълон қилди. Қайд этилишича, вакцина олиб бўлганидан кейин поликлиникада узоқ туриш тавсия этилмайди, чунки бу ҳолат турли инфекцияларни юқтириш хавфини оширади.
Шифокорлар одатда эмлашдан кейинги реакцияларни кузатиш мақсадида 30 дақиқа кутишни тавсия қилади. Бироқ бу вақтни даволаш муассасаси ичида эмас, балки унинг ҳовлисида ёки ташқарисида ўтказиш мақсадга мувофиқ.
Шунингдек, болани эмлашга олиб боришда уни қалин кийинтириш мумкин эмас. Агар бола терлаган бўлса, унинг кийимларини ечиб, танасининг қуруши кутилганидан сўнг эмлашга рухсат этилади. Бу боланинг организмида ортиқча иссиқликни камайтиради ва вакцина таъсирини енгиллаштиради.
Қўмита болага эмлашдан кейин шарбат ёки ширин ичимликлар бериш тавсия этилмаслигини ҳам қайд этди, чунки бу организмнинг вакцинага мослашиш жараёнини секинлаштириши мумкин. Агар бола терлаб кетган бўлса, уни илиқ сувга ботирилган сочиқ билан артиш, кейин қуруқ сочиқ билан қуритиш тавсия этилади.
Бола ўзини яхши ҳис қилса, уни ҳар доимгидек чўмилтириш мумкин. Бироқ эмлашдан кейинги уч кун давомида болани кўп одам тўпланган жойларга, меҳмонга ёки боғчага олиб бориш тавсия этилмайди. Агар у соғлом бўлса, икки кундан сўнг боғчага қайтиши мумкин.
Шунингдек, болани йўтал, иситма ёки ич кетиши каби белгилари бўлган одамлардан узоқ тутиш лозим. Бу даврда боланинг касаллик юқтириш эҳтимоли юқори бўлади.
Қўмита таъкидлашича, эмланган болани кўпроқ вақт ажратиб, меҳр билан суҳбат қуриш ва ёқимли муҳит яратиш жуда муҳим. Агар ҳарорат кўтарилса, шифокор тавсияси асосида иситма туширувчи дори берилиши лозим.