Шимолий Кореяда сўнгги ойларда пластик жарроҳликка қарши қаттиқ чоралар кўрилмоқда. Давлат раҳбари Ким Чен Ин кўкрак катталаштириш ва бошқа косметик операцияларни «капиталистик бузуқлик» деб баҳолаб, уларни жиноят сифатида таърифлади. Бу ҳақда бир қатор хорижий оммавий ахборот воситалари хабар берди.
Маълумотларга кўра, сентябр ойи ўрталарида икки ёш аёл ва уларга операция қилган шифокор очиқ суд муҳокамасига чиқарилган. Уларга нисбатан иш силикон имплантларни мамлакатга ноқонуний олиб кириш ва яширин шароитда операция ўтказиш айблови билан қўзғатилган.
Суд ҳукмига кўра, барча гумон қилинувчилар меҳнат лагерларига юборилиши мумкин. Судьялар ва прокурорлар бу амалиётларни «анти-социалистик» ва «ғарбча истеъмол маданиятининг таъсири» сифатида баҳолаган. Мамлакат раҳбариятининг фикрича, бу каби жарроҳликлар миллий маънавият ва идеологияга зид ҳисобланади.
Ким Чен Иннинг бундай қарорлари орқали давлат «маънавий покликни сақлаш» ва ғарбча «мода ғояларининг кириб келишини чеклаш»ни мақсад қилгани таъкидланмоқда. Шу билан бирга, мамлакатда пластик операция қилдиришда гумон қилинган аёллар мажбурий тиббий текширувдан ўтказилаётгани хабар қилинган.
Хорижий кузатувчиларнинг таъкидлашича, бу сиёсат Шимолий Кореянинг идеологик ёпиқ тизимида ахлоқий назоратни янада кучайтиришга хизмат қилмоқда.