Иқтисодий тадқиқотлар ва ислоҳотлар маркази (ИТИМ) мамлакатда фаолият юритаётган 35 та тижорат банкини қамраб олган навбатдаги «Банклар фаоллик индекси»ни тақдим этди. Ушбу индекс 27 та коэффициент асосида ҳисобланиб, республика ўртача кўрсаткичлари ва халқаро стандартлар билан таққосланади.
Марказ маълумотларига кўра, 2025 йилнинг III чораги якунларига кўра, банк тизими активлари 863 трлн сўмга етган. Мажбуриятлар ҳажми 734 трлн сўмни ташкил этган. Кредитлаш суръати 14 фоизга секинлашган бўлса, жамғарма ва омонатлар 28 фоизга ўсган. Миллий валютадаги операциялар улушининг ошиши сўмнинг бозордаги барқарор ролини кучайтирган. Секторнинг умумий соф фойдаси 9 трлн сўмга етиб, капитал рентабеллиги 11,2 фоизга ошди.
Муаммоли кредитлар улуши 4,2 фоиздан 3,8 фоизга пасайди, бу кредит портфели сифати яхшиланганини англатади. Йирик банклар гуруҳида «Капиталбанк», «Траст банк», «Ҳамкор банк» ва «Ориент финанс банк» етакчи тўртликни сақлаб қолди. «Ипак йўли банк» биринчи бор кучли бешликка кирди, «Ўзбекистон Миллий банки» икки поғона юқорилади. Шу билан бирга, «Халқ банки» ва «Тенге банк» пастга тушди.
Кичик банклар рейтингида 15 молиявий муассасадан 8 таси ўз позицияларини сақлаб қолди. «Универсал банк» етакчиликни давом эттирди, «ТВС банк» иккинчи ўринга кўтарилди. Энг катта ўсишни «AВO банк» ва «Эрон Содерот банк» намоён этди, «Мадат инвест банк» эса икки поғона пасайди.
Марказ таъкидлашича, депозитларни фаол жалб этиб, кредит рискларини назоратда ушлай олган банклар юқори натижаларга эришмоқда. Умуман олганда, Ўзбекистон банк тизими барқарорликни сақлаган ҳолда рақобат муҳитини кучайтирмоқда ва молиявий бозордаги фаоллигини оширмоқда.