The Economist нашрининг ёзишича, Украина Россиянинг энергетика инфратузилмасига зарбаларни кучайтириб, мамлакат нефт қайта ишлаш салоҳиятини кескин пасайтирди. Августдан бери дрон ҳужумлари сони ҳафтасига икки-уч мартадан тўрт-беш мартагача ошган ва тез орада кундалик тус олиши мумкин. Сўнгги кунларда Украинанинг Fire Point FP-1 дронлари Новороссийск терминали, Бошқирдистондаги завод ҳамда Чувашиядаги насос станциясига зарба берган.
Мутахассислар баҳосига кўра, Россиядаги нефт қайта ишлаш қувватларининг тахминан 40 фоизи жабр кўрган, 20 фоизи эса тўлиқ тўхтатилган. Бу кунига бир миллион баррелдан ортиқ ёқилғи йўқотишини англатади. Айрим заводлар, жумладан Рязандаги йирик НҚИЗ, бир неча бор ҳужумга учраган. Санкциялар туфайли ускуналар етказиб бериш қийинлашгани сабаб, бензин ва дизел ишлаб чиқаришдаги узилишлар айни вақтда жуда хавфли ҳисобланмоқда.
Дизель экспорти 30 фоизга камайиб, 2020 йилдан буёнги энг паст даражага тушди. Россия ичида ёқилғи танқислиги ва АЁҚШлардаги узун навбатлар кузатилмоқда. Қримда ёқилғи сотиш чекланган — ҳар бир автомобилга 30 литрдан ошмаслиги белгиланган. Москва эса жавоб сифатида дизел экспортига қисман тақиқ жорий этди ва бензин экспортига бўлган тақиқни йил охиригача узайтирди.
Украина ҳужумларда кунига 100 дан ортиқ ишлаб чиқарилаётган Fire Point FP-1 дронларидан фойдаланмоқда. Уларнинг парвоз масофаси 1500 км, баҳоси эса тахминан 55 минг долларни ташкил этади. Шунингдек, янги FP-5 «Фламинго» қанотли ракеталари 3000 км масофадаги объектларни 1 тоннадан ортиқ зарбдор қисми билан нишонга олиш имкониятига эга.
Таҳлилчиларнинг фикрича, Украина бу орқали Россиянинг урушни молиялаштириш салоҳиятини издан чиқаришни кўзламоқда. Россия аҳолиси эса ҳужумлар оқибатини кун сайин кўпроқ ҳис қилмоқда. The Economist нашрининг таъкидлашича, нефт заводларига доимий зарбалар АҚШ президенти Доналд Трампнинг Украинага нисбатан муносабатини ҳам қайта кўриб чиқишига туртки бўлган. Жумладан, Украинага 3 минг км олисликка уча олувчи Tomohawk қанотли ракеталарини бериш муҳокама қилинмоқда.