Ленинград областида жойлашган «Киришинефтеоргсинтез» нефтни қайта ишлаш заводи (НҚИЗ) 4 октябр куни дрон ҳужумига учрагач, ўзининг энг йирик қайта ишлаш қурилмасини тўхтатди. Бу ҳақда Reuters агентлиги икки манбага таяниб хабар берди.
Маълумотларга кўра, Россияда нефтни қайта ишлаш ҳажми бўйича иккинчи ўринда турган корхона 40 фоиз ишлаб чиқариш қувватини — суткасига 22,8 минг тонна нефт қайта ишлаш имконини йўқотган. Манбалар таъкидлашича, ҳужум ортидан келиб чиққан ёнғин натижасида АВТ-6 қурилмасига зарар етган ва унинг таъмирига камида 3–4 ҳафта керак бўлади.
«Киришинефтеоргсинтез» (ёки қисқача «Кинеф») ўтган йили 17,5 млн тонна нефть қайта ишлаган, бу мамлакатдаги умумий қайта ишлаш ҳажмининг қарийб 7 фоизини ташкил этади. Корхона сўнгги бир ой ичида иккинчи марта дрон ҳужумига учради — 14 сентябрдаги ҳодисада ҳам заводда ёнғин чиқиб, АТ-6 қурилмаси ишдан чиққан эди.
Ҳозир завод мазкур қурилмани қайта ишга туширишга ҳаракат қилмоқда ва бошқа ускуналарни 15 фоизга юқори юкламада ишлатишни режалаштирган. Reuters манбаларига кўра, бу чора орқали корхона нефтни қайта ишлаш ҳажмини 70 фоиз атрофида — тахминан суткасига 40 минг тонна даражасида сақлаб қолиши мумкин.
«Кинеф» октябрь ойида Украина дронлари зарбасига учраган тўртинчи рус НҚИЗига айланди. Илгари «Славнефт-ЯНОС» (Ярославль), Туапсе шаҳридаги «Роснефт» заводи ва Оренбург вилоятидаги «Орскнефтеоргсинтез» ҳам зарбага учраган эди. Сентябрда эса камида тўртта завод — жумладан Новокуйбишев ва Рязан НҚИЗлари фаолиятини қисман ёки тўлиқ тўхтатган.
Дизел ва бензин танқислиги туфайли Россия ҳудудининг кўп қисмида АЁҚШларда навбатлар пайдо бўлди. Ҳукумат Хитой, Сингапур ва Жанубий Кореядан ёқилғи импорт қилиш, шунингдек Беларусдан харидларни ошириш режасини кўрмоқда.
РФ бош вазири ўринбосари Александр Новак сентябр охирида ҳукумат йиғилишида ёқилғи тақчиллиги янада кучайиши мумкинлигидан огоҳлантирган эди.