Апрел ойи натижаларига кўра, Хитойдаги BYD компанияси Европада 7231 дона янги электромобилни рўйхатдан ўтказиб, йиллик ўсишини 169 фоизга етказди. Бу билан у АҚШнинг Tesla компаниясини ортда қолдирди. Tesla электромобиллари рўйхатдан ўтказилиш кўрсаткичи 7165 дона бўлиб, бу ўтган йилнинг шу ойига нисбатан деярли 50 фоизга камайган.
Шундай қилиб, BYD Европада энг кўп сотилган 10 та электромобил бренди қаторига кирди. Tesla эса илк бор 11-ўринга тушиб қолди. Bloomberg нашрининг ёзишича, Jato Dynamics таҳлилий компанияси ушбу бурилишни Европа бозори учун катта аҳамиятга эга деб баҳолаган.
Компания таҳлилчиси Фелипе Муниосанинг таъкидлашича, бу ўзгариш рақамларда кичик кўрингани билан, амалда катта оқибатларга олиб келиши мумкин. «Бу Европа автомобил бозорида янги давр бошланганидан далолат беради», — дейди у.
Қолаверса, агар гибрид турдаги автомобиллар, яъни ток билан ҳам, ёнилғи билан ҳам ҳаракатланувчи моделлар ҳам қўшиб ҳисобланса, BYDнинг умумий сотувлари 359 фоизга ошган. Бу эса компаниянинг Европадаги позициясини янада мустаҳкамлайди.
Bloomberg манбаларига кўра, Европа бозоридаги бу динамика Tesla учун жиддий сигнал бўлиши мумкин. Истеъмолчиларнинг афзалликлари ва рақобат муҳити ўзгармоқда, бу эса глобал автосаноат учун янги чақириқларни юзага чиқариши мумкин.